Без барабыз чишмәбезнең

Салкын суын эчәргә

Су эчкәндә үзеннән - үзе

Баш иелә чишмәгә.

Балалар белән яңа төзелеп кулланылышка тапшырылган чишмәгә бардык. Ерак диеп тормадык туган җиребезнең саф һавасын сулап, җәйге табигатьнең матурлыгына сокланып күңелле сәяхәт иттек, Изгеләр чишмәсенең шифалы сулларын эчтек.

Мәчетләрдә азан тавышы.

Манарада айның балкышы

Изге дога, изге теләкләр,

Иман нурларының балкышы.

Бакча белән саубуллашу көне

Ул гаҗәеп, моңсу, сагышлы.

Шундый көн бу - олы бәйрәм үзе,

Үзгәртә дә куя тормышны.

Моңсу да, шатлыклы да көн ул бакча белән саубуллашу. Кечкенә генә, самими күзләрдә иртәдән үк тирән моңсулык.Бакчадан бердә китәселәре килми шул аларның. Әле бер апаны килеп кочаклыйлар, әле икенчесен.Үзебезнең күзләргә дә яшь тула.... Ак юллар,бәхетләр сезгә, балалар!

Көнең суык булуына карамастан балалар Сабантуен түземсезлек белән көттеләр. Бакчага йөгереп чыгып күп итеп чәчәкләр җыйдылар, аннан сабантуе уеннарында үзыша - узыша катнаштылар. Бәйрәмнең иң күңелле вакыты, әлбәттә, бүләк өләшү булды.

Сагынып көткән җәйнең матур бер көнен юкка уздырмас өчен асфальтка рәсем ясау конкурсы уздырырга булдык. Рәсемнәр арасында әкият геройлары, чәчәкләр, күбәләкләр, яраткан уенчыкларны очратырга була. Конкурсна оештыруда ярдәм иткәне өчен мәдәният йорты мөдире Ахатова Хания апага зур рәхмәтләребезне белдерәбез.

Тормышлар ямьле булсын,

Ямьле булсын, гөрләп торсын,

Эшләрегез уңып торсын,

Илебезне бизәп торсын

Гаилә бәйрәме котлы булсын!

Бакчабызда   Гаилә бәйрәме булып узды. Гаиләне балалардан башка күз алдына да китереп булмый. Әниләребезне бакчага чакырып балалар белән бергә кызыклы уеннар, конкурслар үткәрдек. Әниләребез бәйрәмгә зур әзерлек белән килгәннәр. Рәсем конкурсына үзләренең гаиләләрен чагылдырып рәсем ясаганнар, Нуруллина Рәйнә үз гаиләсе турында шигырь язып килгән.Бәйрәмдә катнашучы әниләребезгә рәхмәтләребезне җиткерәбез!

Картаймагыз әле, ветераннар!

Картаймагыз әле, әй, тынгысыз җаннар!

Сезгә тиеш әле бик күп язлар,

Сезгә тиеш бик күп назлар!

8 май көнне Мишабаш авылында Бөек Ватан сугышында катнашучылар истәлегенә һәйкәл ачу тантанасы булды. Бәйрәмдә балачаклары авыр сугыш елларына туры килгән әби - бабаларыбыз чакырулы иде. Балалар белән бездә һәйкәлгә венок салдык. Бу авыр еллар ерак истәлекләрдә генә калса иде. Илләребез тыныч булсын!

Туган җиребезне яшеллеккә  баету максатыннан без дә балалар белән агач утырттык.Утырткан агачларыбыз яхшы гына төпләнеп, үсеп китсеннәр.

Габдулла Тукай - бөек шагыйрь.2017 елда  Г. Тукайның тууына 131 еллыкны билгеләп үтәбез. Кыска гына гомере эчендә Г. Тукай бик күп истәлекләр калдырган. Бәйрәм уңаеннан безнең бакчабызга кунакка Шүрәле һәм Былтыр абый килде.Алар кызыклы уеннар, бүләкләр алып килделәр. Кунакларны балалар бик ошатты, киләсе елга Су анасында кунакка чакырып калдылар. Бәйрәмне уздырырга зур ярдәм иткән өчен Ахатова Хания апа, Галиева Тәгъзимә апа, Галимзянов Илнар абыйларга зур рәхмәтләребезне белдерәбез.