Татар теле айлыгының бер атнасы Баулы төбәгенең күренекле шәхесләре иҗатын  һәм тормыш юлын  өйрәнүгә багышланды.  Аның беренче көне “Шигъри рухым уяна җанымда” дип исемләнгән очрашу чарасы белән башланды. Безнең беренче кунагыбыз Баулы җирлеге шагыйрәсе Хәмидә Идиатуллина булды. Шушы көннәрдә Үзәк китапханәнең милли әдәбият һәм сәнгать бүлегендә уздырылган “Яшьлегем кайтавазы” китабын тәкъдим  итү кичәсендә безнең укытучыларыбыз актив катнашкан булса, бүгенге очрашуда мәктәбебезнең  6а сыйныфы укучылары җирле шагыйрәбез иҗаты һәм аның 37 ел буе балалар тәрбияләүгә багышланган тормыш  юлының кызыклы мизгелләре белән таныштылар. Хәмидә ханымның  якташ шагыйребез язучы Рәшит Әхмәтҗанов белән  сыйныфташ булуы, шагыйрьнең мәктәп елларындагы истәлекле вакыйгалары турында кызыклы итеп сөйләвен  укучыларыбыз  бик бирелеп тыңладылар. Кунаклар кичә ахырында истәлеккә фото рәсемгә төшеп, Хәмидә Идиатуллинага рәхмәтләрен  белдереп, иҗади уңышлар теләп, саубуллаштылар.

Атналыкның алдагы көннәрендә дә якташ язучыларыбызның иҗаты, тормыш юллары белән танышу дәвам итә.