12 апрель – Бөтендөнья авиация һәм космонавтика көне. Мәктәбебездә әлеге истәлекле датага карата 1 -4 сыйныф укучылары арасында “Җиһан киңлегенә”  дигән рәсем конкурсы уздырылды.

11 апрель көнне Норма мәдәният йортында 5,6,7 нче сыйныф укучылары, аларның әти - әниләре, әби-бабайлары, класс җитәкчеләре көче белән әзерләнгән "Татарстан гөле без" дип исемләнгән концерт булып узды. Әлеге концерт гаилә белән мәктәп арасындагы тыгыз элемтәне тагын бер кат раслады.

«ЭКОВЕСНА» конкурсы кысаларында мәктәбебездә экологик дәресләр узды. 1 а сыйныфы укучылары «Табигатьне саклыйк” темасына үткәрелгән экологик сыйныф сәгатендә актив катнаштылар, табигатьне саклау кагыйдәләрен үзләренең рәсемнәре аша җиткерделәр. 

«Сәламәт бул!» акциясе кысаларында “Замандаш” укучылар оешмасы, РДШ членнары тарафыннан сәламәт яшәү рәвешен пропагандалаучы әңгәмә һәм дәресләр уздырылды.

Бөтенрәсәй «Сәламәт бул!”  (“Будь здоров!” ) акциясе кысаларында “Сәламәт мин – сәламәт Россия” рәсем конкурсы уздырылды. Әлеге конкурста 8 а сыйныфы укучысы Зарипова Динәнең эше җиңүче дип табылды һәм Инстаграм челтәрендә конкурсның алдагы этабында катнашу өчен беркетелде.

Мәктәбебездә тимурчылык хәрәкәте даими эшләп килә. "Тапкырлар" отряды укучылары арада иң активлары.

Балтач урта мәктәбе базасында Татарстан Республикасы Фәннәр Академиясе Президенты Әхмәт Мазһаров исемендәге «Фәнгә адымнар» IV фәнни-гамәли конференция булды. Быелгы конференциядә республикабызның төрле төбәкләреннән барлыгы 71 укучы катнашты. 

«Кошлар килде» акциясе дәвам итә. Укучыларыбыз ясаган ояларны Рамил Абдулбариевич җитәкчелегендә югары сыйныф укучылары мәктәп янындагы агачларга беркеттеләр. Тиздән җылы яклардан туган илләренә кайткан кошлар – сыерчыклар аларга урнашып, куанып сайрарлар.

Мәктәбебез укучылары Гарифуллин Айнур (5 б  класс) һәм Сабирова Әдилә (4 а класс)  Бөтенрәсәй «Илһам» яшь язучылар бәйгесенең зона турында катнашты. Алар Арча шәһәренең 6 нчы номерлы мәктәбендә мәртәбәле жюри алдында имтихан тотты. Җитәкчеләре Кадирова З.А., Вафина Т.М.

2018 нче  елның 31 март - 1 апрель көннәрендә Казан шәһәрендә Чемпионат һәм Россия   беренчелегенә киокушин каратэ  ярышлары узды. Бу ярышларда кекусинкай каратэ түгәрәгендә шөгыльләнүче мәктәбебез спортчылары Шәйхетдинов Булат (4 б класс) һәм Якупова Алинә (6 а класс) уңышлы чыгыш ясап, 3 нче призлы урынга лаек булдылар.