Бөек Җиңүнең 70 еллыгы уңаеннан башлангыч сыйныф укучылары өчен герой-пионерларга багышланган  тәрбия сәгате узды. Балалар сугыш чоры пионерларының  тормыш юлы,  алар  күрсәткән батырлыклар, бу батырлыкларның ил тарихындагы әһәмияте белән таныштылар.

27 февральдә мәктәбебездә 1 сыйныф укучылары укуда беренче җиңүләрен билгеләп үттеләр - “Әлифба” бәйрәме үткәрделәр. 5 кенә укучы булсалар да, барысына да өлгерделәр алар: биеделәр, җырладылар, әкият куйдылар. Әти-әниләр дә, балалар да бәйрәмнән күтәренке кәеф белән таралды.

Район мәктәпләре арасында “Аҗаган-2015” уены уздырылды. Әлеге уенда һәр мәктәптән 10ар кешелек команда 11 төрле ярышта катнашты. Һәр ярышта җиңүчеләр билгеләнде. Граната ату буенча мәктәбебез укучысы Гаптелахатов Булат 3 урынны яулады.

11 сыйныф укучысы Хәкимуллина Иркә  Бөек Ватан сугышында  Җиңүнең 70 еллыгына багышланган Муса Җәлил исемендәге 3 республика фәнни-гамәли конференциядә катнашып сертификатка ия булды.

Татарстан Республикасы Мәгариф һәм Фән министрлыгы, Казан Федераль Университеты уздырган  “Татар лингвокультурологиясе: проблемалар һәм перспективалар” дип исемләнгән VI Бөтенроссия фәнни-гамәли конференциядә 11 сыйныф укучысы Хәкимуллина Иркә “Мәдәни- тарихи мирас һәм традицияләр” секциясендә чыгыш ясады. Ул әлеге секциядә  “Фронтовик – шагыйрь Хәбра Рахман” дигән фәнни эшен яклады һәм “Иң яхшы доклад” номинациясендә җиңүче булды. Иркә грамота һәм әлеге фәнни эшләр тупланган җыентык белән бүләкләнде. Иркәне һәм әлеге фәнни эшнең җитәкчесе Роза Александровнаны чын күңелдән котлыйбыз.

Укучыларыбыз әтиләрен, абыйларын һәм бабайларын “Ватанны саклаучылар” көне белән котладылар һәм аларга үз куллары белән ясалган бүләкләр тапшырдылар.

Мәктәп күләмендә традицион “Аҗаган” уены уздырылды. Әлеге  чарада ярышлар Бөек Җиңүнең 70 еллыгына багышлап оештырылды. Аҗаганда укучыларыбыз  беренче медицина ярдәме күрсәтү, юл йөрү кагыйдәләрен өйрәнү, яралы сугышчыны сугыш кырыннан алып чыгу, дошман танкларын юк итү,  пожар куркынычсызлыгы, гражданская оборона буенча ярышларда катнашты . Махсус карта буенча хәрәкәт итеп, авыл эченә яшерелгән серле пакетны  эзләү генә дә ни тора бит. Ә   барлык ярышлардан соң кырда пешкән бәрәңге ашау ничек рәхәт!

“Ватан сакчылары” көне уңаенан Советлар Союзы Герое Габдулла Гарифуллин һәйкәленә, Бөек Ватан сугышында ятып калган авылдашларыбыз хөрмәтенә куелган обелискка веноклар салдык. Әлеге венокларны укучылар үз куллары белән ясадылар. Шулай ук һәйкәл янында сугыш батырларын 1 минут тынлык белән искә алдык.

Бөек Җиңүнең 70 еллыгы якынлашкан көннәрдә укучыларыбыз мәктәбебез  музеена экскурсияләргә йөриләр. Алар музейда Бөек Ватан сугышы чорында авылдашларыбыз кылган батырлыкларны кабат исләренә төшерәләр, тыл һәм сугыш ветераннары белән танышуны дәвам итәләр.

Бөек Ватан сугышы батырлары истәлегенә куелган обелискны, Советлар Союзы Герое Габдулла Гарифуллин һәйкәлен  мәктәбебез укучылары онытмый, без аларны даими чистартып торабыз.