Район мәдәният үзәгендә, үз хезмәт үрләрендә югары нәтиҗәләргә ирешкән, һөнәри бәйгеләрдә җиңү яулаган укытучыларыбызны һәм фән нигезләрен ныклап үзләштергән, төрле бәйгеләрдә йолдыз булып кабынган укучыларыбызны хөрмәтләү тантанасы – традицион «Талантлар фестивале - 2026» узды. Тантана барышында укытучыларга намуслы хезмәтләре, яшь буынга белем һәм тәрбия бирүдәге фидакарьлекләре өчен рәхмәт сүзләре яңгырады. Аларның һәркайсы - үз эшенең остазы, балаларга белем дөньясының ишекләрен ачучы, аларны олы тормыш юлына әзерләүче мөхтәрәм затлар. Укытучыларыбызның уңышлары - ул еллар дәвамында куелган тырышлык, сабырлык һәм мәхәббәт нәтиҗәсе. Ә инде укучыларыбыз – аларның горурлыгы. Фән нигезләрен тирәнтен үзләштереп, төрле бәйгеләрдә, олимпиадаларда, иҗади бәйгеләрдә, спортта югары нәтиҗәләр күрсәтеп, алар үзләренең сәләтле, максатчан булуын раслады. Аларның җиңүләре - укытучыларның гына түгел, ә ата-аналарның, туганнарның да зур шатлыгы. Бүләкләү тантанасы барышында иң-иңнәргә Балтач муниципаль районы башлыгының, район башкарма комитеты җитәкчесенең, район мәгариф идарәсе җитәкчесенең Мактау кәгазьләре, Рәхмәт хатлары, истәлекле бүләкләр һәм дипломнар тапшырылды.