Бөек Җиңүнең 67 еллыгы якынлашкан көннәрдә “Туган төбәкне өйрәнү” түгәрәгенең активистлары, татар теле һәм әдәбияты укытучысы, музей җитәкчесе  Кашапова Фәнүзә Әнвәр кызы белән берлектә бистәбездә сугыш кырыннан әйләнеп кайткан ветераннарның , хезмәт һәм тыл ветераннарының сөйләүләреннән чыгып хатирәләрен туплау һәм үсеп килүче буынны патриотик рухта тәрбияләү, зур буынга ярдәм күрсәтү максатыннын очрашулар үткәрә башлады.   Бүгенге очрашу Бөек Ватан сугышы китергән хәсрәт, михнәт дәрьясын соңгы тамчысына хәтле эчеп, өсләренә ишелгән бөтен авырлыкларга чыдап-түзеп, ил-көн өчен сәламәтлекләрен, яшьлекләрен, бәхетләрен корбан итүче газиз җан –тылда эшләүче ветеран Наилә апа Гәрәевага багышлана. Ул безгә сугыш башланган көн, сугыш чоры, сугыштан соңгы елларның авырлыклары турында сөйләде. Без ветераннарыбызны бер бәйрәмнән дә читтә калдырмыйча мәктәпкә еш чакырабыз. Наилә апа моңа кадәр тормыш иптәше , сугыш ветераны Шәһадәт  абый белән килә иде. Кызганыч,  ул бу юлы килә алмаган. Мәктәп укучылары аларны һәрвакыт көтеп ала. Наилә апа безгә, мәктәп укучыларына, изге теләкләрен җиткерде. Соңыннан очрашу истәлеге итеп фотосурәткә төштек. Бәхетле киләчәк бүләк иткәннәре өчен, без ветераннарга рәхмәтле һәм алар алдында баш иябез.

 Ситдыйкова Альбина , 11 нче Б сыйныфы укучысы