Мәктәбебездә «Мин татарча сөйләшәм» акциясен уздыру - матур традияциягә әйләнеп бара. Ел да аны Габдулла Тукай туган көненә туры китереп  апрель аенда оештырабыз. «Мин татарча сөйләшәм» акциясен мәктәбебезнең “Кояшкай” яңа буын яшьләре хәрәкәте оештыра.

Акция барышында  1-11сыйныф укучылары яңа татар җырларын  башкардылар, шигырь конкурсында катнаштылар, викторина сорауларына җавап бирделәр, төрле бәйгеләрдә үзләрен сынап карадылар,иң мөһиме-татарча гына сөйләштеләр! Татар телендә сөйләшүчеләр бүләкләргә ия булдылар!

Бәйгенең төп максаты – халыкны, бигрәк тә яшьләрне татар телендә сөйләшүгә өндәү. Әгәр татарча сөйләшүне гамәлгә кертсәк, бу акциянең төп максаты тормышка ашыр дип уйлыйм.

Бөтен Казанны гөрләтеп, урамда, эшли, укый  торган җирдә, гаиләдә  татарча сөйләшсәк иде! Чөнки барыбыз да аңлыйбыз - бүгенге көндә әле татарча сөйләшүче буын бар, ә 50-100 елдан соң, "татар телендә сөйләшүче булыр микән?" дигән зур сорау торачак. Шуңа күрә, үзебез сөйләшмәсәк, телне саклый алмаячакбыз. “Мин татарча сөйләшәм!” акциясе - ул бер тамаша гына түгел, ул бөтен җирдә татарча сөйләшү дигән сүз”!

                                                                                        Г.Н.Хәйруллина