1-8 класс укучылары өчен 2019-2020 нче уку елы төгәлләнде. Бу классларның ата-аналары өчен дистанцион класс җыелышлары узды. Җыелышта уку йомгаклары, җәйге каникулны оештыру, куркынычсызлык кагыйдәләрен үтәү мәсьәләләре каралды.

   2019-2020 нче уку елын төгәлләү башка елларга караганда үзенчәлекле булды. 1-8 класс укучылары өчен уку елы 23 майда, 9 класс укучылары өчен 30 майда төгәлләнә.  Җәйге каникулларны файдалы, хәвеф-хәтәрсез үткәрегез!

   Бүген дистанцион рәвештә классларда"ТАССРга - 100 ел" дип аталган тәрбия сәгатьләре узды.

    Республикада һәм районда "Тарихны шәхесләр тудыра" ("История в лицах") дистанцион акциясе башланды. Укучылар, укытучылар белән берлектә, туган мәктәбебезне тәмамлап, илебезнең төрле почмакларында яшәүче, татар халкының тарихын дәвам итүче шәхесләрне барлыйлар, алар турында истәлекләр туплыйлар. Шундый шәхесләрдән күп еллар  "Бәкер" шифаханәсе директоры булып эшләгән Ф.И.Ибраһимов, Свердловск өлкәсендә  Татарстан Республикасы вәкиллеге рәисе урынбасары Ф.А.Сафиуллина, илебезнең авыл хуҗалыгын күтәрүдә үзеннән зур өлеш керткән И.Г.Валиев, танылган журналист Р.Г.Фатхрахманов, атказанган авыл хуҗалыгы хезмәткәрләре, укытучылар, табиблар һәм башкалар турында материаллар туплана.

   Быелгы истәлекле даталарның тагын берсе - Татарстан Республикасы төзелүгә 100 ел тулачак. Бу уңайдан да укучылар белән эзләнү эшләре алып барыла. Газета-журнал материаллары белән танышабыз, ТАССР төзүгә зур өлеш керткән шәхесләрнең биогафияләрен өйрәнәбез.

    19 май - пионер туган көн. Бүгенге укучыларның әбиләре-бабайлары, кайберләренең әниләре-әтиләре пионер сафларында тәрбияләнделәр. Пионер - беренче дигән сүз. Бүгенге көндә аны варислар сүзе белән алыштырдылар. Пионериянең данлы үткәне, герой-пионерлар турында бүген дистанцион тәрбия сәгатьләре узды. Пионерия - ул безнең үткәнебез, безнең тарихыбыз!

   18 май - халыкара музейлар көне. Шушы уңайдан укучыларга илебезнең төрле почмакларында урнашкан музейларга дистанцион  кереп, андагы материаллар белән танышырга тәкъдим ителде. Класс җитәкчеләре тәрбия сәгатендә музейларның барлыкка килү тарихы, аларның төрләре һәм музейларның әһәмияте белән таныштырдылар.

   Класс җитәкчеләре укучылар белән дистанцион рәвештә төрле чаралар үткәрәләр. 15 май - гаилә көненә карата  "Гаилә - тормыш нигезе " дип аталган тәрбия чаралары үтте.

   2020 нче ел - истәлекле даталарга бай ел. Шуларның берсе - Арча районы төзелүгә 90 ел. Шушы уңайдан мәктәптә Ш.Мәрҗани музее әгъзалары тикшеренү эшләре алып баралар. Төрле чыганаклардан район тарихы, районның данлыклы кешеләрен барлый башладылар. Бу эш дистанцион рәвештә бара.

    Язгы чорда мәктәп яны тәҗрибә участогында эшләр башлана. Саклык чаралары күреп, кишер, чөгендер, суган утырту өчен түтәлләр әзерләү эше оештырылды.