Һәр кешенең “Менә ул чын укытучы!” диярлек остазы бар. Ул аны еллар үткән саен сагынып искә ала, гомер буе аңа рәхмәт укый. Талантлы укытучы үз белемен башкаларга биреп кенә калмый, сабыйлар күңеленә яхшылык орлыклары, өмет чаткылары өләшә, ул аларның авырлыкларын җиңеләйтә, күңелләрен аңлый белә. Укытучының сабырлыгы аналар сабырлыгына тиң. Әмма моның өчен укытучы булып туарга, гомерең буе укытучы булып яшәргә кирәк. Чын укытучы хәтта лаеклы ялга чыккач та укытучы булып кала бирә. Әйе, укытучы ул һөнәр генә түгел, ул – язмыш!
14 октябрь көнне Урта Курса авыл Мәдәният йортында үткәрелгән “Рәхмәтемнең иң олысы сиңа булсын, укытучым!” исемле әдәби-музыкаль кичә дә әнә шул сабыр, мөлаем затларга - ветеран укытучыларга багышланды. “Мәдәният йортына моның кадәр халыкның моңарчы килгәне юк иде!” – диеште аптырашта калган мәдәният йорты хезмәткәрләре. Әйе, халык күп иде, чөнки барысы да яраткан остазларына күңел түрендә йөрткән рәхмәт сүзләрен җиткерергә, яраткан укытучыларын хөрмәтләргә, хезмәтләрен зурлап, алар каршында баш ияргә дип килгән.
Кичә барышында һәр укучы үзенә гыйлем биргән укытучыларына рәхмәт сүзләрен җиткерде, хатирәләр йомгагы сүтелде, күңелләр тулды... Әлеге чараның төп оештыручы, инициаторы булган Урта Курса авыл җирлеге башлыгы Рәмзия Рамазан кызы Вафинага, шулай ук Мәдәният йорты хезмәткәрләренә чын күңелебездән рәхмәтләребезне җиткерәбез. Биш сәгатькә якын барган бу чарадан алган тәэсирләр, җылылык йөрәкләрдә әле озак сакланыр.