Һөнәр сайлау – кеше тормышында иң әһәмиятле мәсьәләләрнең берсе. Заман үзгәрә барган саен, тормыш яңа һөнәрләр таләп итә. Бүгенге көндә авыл хуҗалыгы - иң кирәкле тармак, анда эшләүче  белгечләргә, игенчеләргә дә ихтыяҗ зур.
       Укучыларны авыл хуҗалыгы һөнәрләре  белән тулырак таныштыру,  аларга төрле белгечлекләрне сайлап алу юнәлеше  бирү максатыннан, буген мәктәптә әлеге өлкәдә хезмәт куючы  җитәкчеләр белән очрашу үтте. Мәктәп директоры Яруллин Р. Р. әлеге очрашуның чыгарылыш класс укучылары өчен бик тә әһәмиятле булуын  ассызык лады. Арча аграр көллияте директоры Дәуләтбаев З.М. әти - әниләрне һәм укучыларны әлеге уку йортында алырга мөмкин булган белгечлекләр, уку кабинетлары, укырга керү шартлары белән бик тулы итеп таныштырды. Районның авыл хуҗалыгы бүлеге житәкчесенең урынбасары Абдуллин Л.И.авыл хужалыгы өлкәсендә эшләгән яшьләргә бик күп мөмкинлекләр тудырылуын җиткерде. Курса МТС ы житәкчесе Гыйләҗетдинов Р. Г. мәктәпне бетереп чыккан бик күп яшьләрнең колхозның төрле тармакларында тырышып хезмәт куюларын билгеләп үтте. Зоотехник булып эшләуче Абдуллин Р. Р., яшь агроном Хәбибуллин Р. Р. авыл хуҗалыгы өлкәсендә  яратып эшләүләре турында сөйләделәр. Бүгенге очрашу  укучыларга һөнәр сайлап алуда гаять әһәмиятле һәм кирәкле иде.

1 нче сыйныфта Әлифба бәйрәме үтте. Укучылар җырладылар, табышмаклар чиштеләр, үзләренең чын укучы икәнлекләрен күрсәттеләр. Беренчеләрне зур җиңүләре белән котлыйбыз, алга таба да уңышлар сезгә!              

"Фью!", "Фью!" - кемдер сызгыра, мине үрти. Инде ничә мәртәбә артыма борылып карадым, һичкем юк. Гүя кемдер качып кына мине үчекли. Башымны күтәреп карасам, мине үртәүчеләр агач башында утыра икән, ләбаса! Юк ла үчекләми алар, ә яз килгәнгә, туган якларына исән-сау әйләнеп кайтканнарына сөенәләр минем  сөекле сыерчыкларым! Кайтып җиткәннәр, җанашларым! Димәк, чын-чынлап яз килде дигән сүз. Димәк, тиздән, бик тиздән карлар эреп бетәчәк, күңелләрне яз кояшы иркәләячәк. Әнә шулай укучылар белән иртә баштан сыерчыкларны күзәттек әле.

Килә язлар, китә язлар

Һәр ел саен үзгәрелә...

Һәр ел саен Тукай гына

Япь-яшь хәлдә килә безгә.

Апрель… Апрель белән җиргә чын яз килә. Аның белән безгә Тукай килә. Әйе, апрель ае – бөек шагыйребезнең туган ае, шигърият ае. Шул уңайдан бүгенге сыйныф сәгатендә 8 сыйныф укучылары Габдулла Тукайның тормыш юлы, иҗаты, журналистик эшчәнлеген искә төшерделәр. “Исемдә калганнар” әсәреннән өзекләр сөйләделәр.

Яздан аерып булмый Тукайны!

Язда килгән, язда ул янган.

Язы, киләчәге барлар ничек китсен,

Ничек югалалсын дөньядан.

                               Равил Фәйзуллин.

Габдулла Тукай иҗаты турында булган белемнәрне тирәнәйтү, ныгыту,  Г.Тукай иҗатына, туган телгә мәхәббәт тәрбияләү, бәйләнешле сөйләм телләрен, сәнгатьле уку күнекмәләрен үстерү максатыннан 6нчы сыйныфта «Без — Тукайлы халык» исемле класс сәгате булып узды. Чара барышында Г.Тукайның тормыш  юлы һәм иҗаты искә төшерелде.

Яз җитүгә бар табигать уяна, җанлана. Табигатькә  тагын да ямь өстәп, көзен киткән кошларыбыз кире туган якларына  кайта. Инде кара каргалар килде. Аларның "мәш" килүләрен күзәтү үзе бер күңелле.  Озакламас, алар артыннан сыерчыклар да килер. Без аларны көтәбез, инде оялар да ясап элеп куйдык. Көннәр җылынып беткәч карлыгачлар, тургайлар, сандугачлар да озак көттермәс... 

4нче сыйныф укучылары да сыерчыкларны зарыгып көтә, алар "Килегез, кошкайларым!"  дип исемләнгән әңгәмәдә дә бик теләп катнаштылар, хис-кичерешләре белән бүлештеләр, кошлар хакында яңа белемнәр алдылар

.

1нче сыйныфта «Язгы бозда сак бул!»  темасына сыйныф сәгате үтте.

--

6нчы сыйныф укучылары белән «Сәламәтлек — зур байлык» исеме астында әңгәмә булып узды. Укучылар белән организмга зыянлы һәм файдалы ризыклар турында, телефон, телевизорның зыяны турында сөйләшенде. Сәламәтлек турында мәкальләр искә төшерелде.

Һәр милләт үз җирлегендә барлыкка килгән һәм буыннан-буынга күчә торган гореф-гадәтләрен, кешеләрнең яшәү рәвешләрен, үз-үзләрен тоту кагыйдәләрен, карашларын, зәвыкларын сакларга омтылган. Тормыш–көнкүрештә билгеле бер йолалар үтәү, гореф-гадәтләрне тоту һәм бәйрәмнәр үткәрү барлык милләтләргә дә хас. Ул әлеге милләт мәдәниятенең мөһим бер өлеше булып исәпләнә. Гореф-гадәтләр борын-борыннан халык тарафыннан үтәлеп килә торган бәйрәмнәрне, йолаларны үз эченә ала. 9 нчы сыйныф укучылары милли гореф-гадәтләр белән таныштырдылар, чыгышларны бик кызыксынып тыңладылар. 
 

Кояш җиребезгә җылысын да, яктысын да бик юмарт бирә. Кар күзгә күренеп кими. Укучыларыбыз өй тирәләрендә шушы процессны тизләтү өчен тырышалар.