“Нәүрүз”  - борынгы әби-бабаларыбыз үткәргән язны каршылау бәйрәме ул. Ул көн белән төн тигезләшкән чакка - 21-22 нче мартка туры килгән. "Нәүрүз" сүзе яңа ел, яңа көн дигәнне аңлата. Бу - табигатьтә чын – чынлап яз башланган көн.
Борынгы бәйрәмне атна буе дәвам иткәннәр, hәр көннең үз гадәте, үз тәртибе, язылмаган кануннары булган: 7 көн буена гайбәт сөйләмәгәннәр, начарлык теләмәгәннәр, туган-тумачага, күрше-күләмгә миhербанлык кылганнар, ата-баба каберенә барганнар, сугышлар тукталып торган. Бу көнне яшьләр, шәкертләр, балалар, өйдән-өйгә кереп, бәет, шигырьләр әйткәннәр, йорт хуҗасына исәнлек-саулык, иминлек-байлык, бәхет, уңышлар теләп йөргәннәр.
Бүген мәктәбебездә дә бу бәйрәм билгеләп  үтелде. Укучылар бәйрәмнең тарихы белән таныштылар, халкыбызның дәртле җырларын башкардылар, борынгы такмакларын тыңладылар.  Бәйрәмнең икенче өлешендә тәмле боткадан, коймактан авыз иттеләр, җырлы-биюле уеннарда катнаштылар.