Тәмле ашарга барыбыз да яратабыз. Ә менә телләреңне йотарлык итеп ашарга әзерли белү... монысы инде һәркемнең уңганлыгына, тырышлыгына бәйле. Әнә шул осталыкка яхшы кәеф, күңел җылысын да өстәгән пешекчеләр әзерләгән ризыкны ашаган саен ашыйсы килә. 
Мәктәбебез ашханәсендә дистә елдан артык пешекче булып эшләүче  Шәфыйкова Гөлүсә Гәрәй кызына әлеге билгеләмә бик туры килеп тора. Мәгариф системасына керткән өлеше һәм күпъеллык хезмәте өчен, һөнәри бәйрәмнәре уңаеннан, Гөлүсә Гәрәй кызы Арча районы мәгариф идарәсе җитәкчесе Мөхәмәдияров Рамил Данил улы һәм Арча мәгариф идарәсенең башлангыч профсоюз оешмасы  тарафыннан  Мактау грамотасы белән бүләкләнде. 
Барлык пешекчеләрне 20 октябрьдә билгеләнүче һөнәри бәйрәмнәре белән тәбрик итәбез! Сезнең һәрберегезгә рух ныклыгы, күңел көрлеге һәм сәламәтлек телибез. Ил-көнегез тыныч, барыр юлларыгыз киң, туар таңнарыгыз имин, йортларыгызда иминлек, гаиләләрегездә тынычлык, муллык булсын!