21 нче февральдә Халыкара туган тел көне билгеләп үтелә. ЮНЕСКО тарафыннан игълан ителгән әлеге халыкара бәйрәм дөньядагы телләрне саклау, аларны киләчәк буынга исән-имин җиткерү макстатыннан оештырыла. Безнең телебез – татар теле. Шуңа күрә һәр татар кешесе үз теленә хөрмәт белән карарга тиеш. Сабыйларыбызның теле туган телдә ачылсын. Телебезнең кулланылыш даирәсен киңәйтү, аны балаларыбызга һәм оныкларыбызга тапшыру – безнең төп бурычыбыз.
Г.Камал исемендәге Сикертән төп мәктәбендә 21 нче февраль - Халыкара туган телләр көне буларак билгеләп үтелде. Шул уңайдан “Яшәр, әле туган телем!” дип исемләнгән әдәби кичә үткәрелде. Укучылар төрле телләрдә туган телебез турында шигырьләр сөйләделәр, милли җырлар, төрле халыкларның биюләрен башкардылар. Бәйрәм чарасы һәркемнең күңеленә хуш килде.
Туган телебезне саклыйк, яклыйк, чөнки милләтнең яшәешендә туган тел иң мөһим урыннарның берсен алып тора!