Бүген бакчабызда Арча мәгариф идарәсе һәм   Арча үзәкләштерелгән китапханәләр системасы белән берлектә туган телебезгә һәм илебезгә хөрмәт хисе тәрбияләү максатыннан оештырылган  очрашу  булып узды. Әлеге кичәгә “Каурый каләм” әдәби иҗат берләшмәсеннән якташ шагыйрьләребез  Халидә Фәйзрахманова, Дамир Нуриәхмәтов, Адилә Әхмәтҗанова  чакырулы иде.  Китапханәче һәм берләшмәнең җитәкчесе Адилә Әхмәтҗанова  балаларны китапханә һәм берләшмә эшчәнлеге белән таныштырып узды.  Очрашуда  шагыйрьләр үз иҗат җимешләре белән таныштырса, сабыйлар аларның әсәрләрен яттан сөйләде. Балалар “Каурый каләм” берләшмәсе әгъзаларының тормыш юлына, иҗатына кагылышлы кызыксындырган  сорауларына җаваплар  алдылар. Кичә  бию, уеннар белән үрелеп барды һәм Габдулла Тукайның “Туган тел” шигыренә язылган җыр белән тәмамланды. Мондый җылы  эчтәлекле кичәләр  көтеп калабыз дип аерылыштык.