2021 нче ел – Туган телләр һәм  халыклар  бердәмлеге  елы  уңаеннан бакчабызда һәр милләтнең үз туган теле булуын, туган телне яратырга, сакларга кирәклеген  аңлату максатыннан “Туган телем – саекмас чишмә” исемле әдәби кичә узды. Мәктәпкә әзерлек төркеме балалары Идел буе милләтләренең – татар, рус, мари, башкорт, чуаш, удмурт халык киемнәрен киеп, гореф-гадәтләре белән  таныштырып, бергәләшеп, һәр  милләтнең  уеннарын  теләп  уйнадылар. Габдулла Тукай сүзләренә язылган “Туган тел” җыры  белән  туган телгә багышланган кичәдә мәдхия  җырладылар. Балаларыбыз чыгышларында үз милләте, үз туган теле белән  горурланулары, шул ук вакытта  башка   милләтне  хөрмәт  итүче  толерант шәхес  булуларын да күрсәттеләр.

         Кичәдә  “Казан  арты” тарих-этнография  музее  җитәкчесе Г.Г.  Камалова да   катнашты. “Туган телендә тәрбияләнгән  сезнең  кебек балалар   гына  үз милләтенә, теленә, гореф-гадәтенә  ихтирамлы  була” -  дип ассызыклады  ул. Үткәнебезне  күрергә, белергә  өндәп, музейга  чакырды. Ә без, “Үткәнен белмәгәннең киләчәге юк” мәкаленә тугры калып, үткәнебезне  өйрәнербез, туган телебезне  сакларбыз  дип сүз бирдек.

       Әлеге кичә  балаларыбыз  тарафыннан “Дуслык” вальсы   һәм җыры белән  тәмамланды.