Электронное образование Республики Татарстан

Бүген "Татарстанда җәй" проекты кысаларында Гаилә паркында балалар өчен бәйрәм узды. Бу бәйрәм кызыклы уеннарга, концерт номерларына бай булды. Бәйрәмебезгә Габдулла Тукай әкиятләре геройлары ямь өстәделәр.

Бүген - кояшлы җәйнең беренче көнендә, балачакның иң матур бәйрәме – Балаларны яклау көне.
Елның кайсы гына вакыты булмасын балачакның һәрбер мизгеле рәхәт тә, татлы да булып истә кала. Балаларның киләчәге матур булсын өчен тыныч, имин тормыш, яраткан туган җир, гаилә җылысы, күңелле балачак кирәк. Балачак иле гел шаулап-гөрләп торсын!

Без дә бүген бакчага килгән балаларны матур итеп, чын бәйрәм ясап каршы алдык. Мультфильм геройларын күреп, балалар гына түгел, хәтта әти-әниләр дә сөенделәр.
 

Кичә балалар, педагоглар, ата-аналар күңелендә матур мизгелләр калдырды. Балаларның бәйрәмдә рус һәм татар телендә шигырьләр сөйләве, җырлавы, килешле итеп вальс әйләнүләре дә һәркемнең күңеленә хуш килде. Балалар үзләрен уңган, зирәк, акыллы итеп таныттылар. Сөенечле, моңсу мизгелләр күп булды бәйрәмдә. Аны онытылмаслык итеп уздыруда шушы балаларны бакча бусагасын беренче көннән үк бик күп нәниләрне тәрбияләгән, безнең балаларыбызның нәни генә уңышларына да сөенеп, алар белән горурланып, йөрәк җылысын биреп, ихлас, таләпчән, ачык күңелле, бала белән һәрчак янәшәдә атлаучы тәрбиячеләребез мактау сүзләренә бик тә лаеклы. Бүген без икенче мәктәпкәчә яшьтәге төркем балаларны тормышның янә бер баскычына күтәрәбез - мәктәпкә озатабыз.

Балаларга бүләкләр тапшырылды. Аннан балалар, бакча бусагасын атлап чыгып, төсле шарларны зәңгәр күккә очырдылар. Шушы очып киткән шарларга карап, балалар бакчасында узган мизгелләрне искә төшереп, әти-әниләрнең, тәрбиячеләрнең, балаларның күзләре яшьләнде. Чөнки алар балачак иле белән саубуллашты. Ак юллар сезгә, балалар! Сезне тылсымлы белем дөньясы көтә!  Без балалар белән генә түгел, аларның әти-әниләре белән дә  моңлану хисе белән хушлашабыз.

Кадерле әти-әниләр! Балаларыгыз өчен сезгә  зур рәхмәт! Сәламәтлек һәм иминлек сезгә!