Үсеп килүче буында хокук тәртибенә җаваплы караш тәрбияләү һәм полиция хезмәткәрләренең эшенә хөрмәт уяту максатыннан, безнең балалар бакчасының уртанчылар төркемендә истәлекле чара узды. Нәниләр янына очрашуга төркемдәге дуслары Рамазан Шәкүровның әтисе — чын полиция хезмәткәре килде.

Очрашу барышында кунак балаларга хокук сакчыларының җаваплы һәм куркыныч хезмәте, урамда үз-үзеңне дөрес тоту һәм куркынычсызлык кагыйдәләре турында сөйләде. Балалар полиция хезмәткәренең махсус җиһазларын зур кызыксыну белән карадылар, формасына сокландылар. Очрашу дусларча мохиттә узды, нәниләр кунакка үзләрен кызыксындырган сорауларын бирделәр.

Рамазанның әтисенә балаларга онытылмаслык очрашу бүләк иткәне һәм файдалы белемнәр җиткергәне өчен оешмабыз исеменнән зур рәхмәтебезне белдерәбез! Хезмәтегездә уңышлар һәм тынычлык телибез!