Рус теле һәм әдәбияты атналыгы кысаларында, 6 сыйныф укучылары белән "Филология иленә сәяхәт" уены уздырылды.

Гимназиябезнең 5В сыйныф укучылары бүген Чаллы шәһәренә Дельфинарийга барды. Дельфиннар Гимаев Русланга картина ясап бирсә, Галиев Самирга дельфинда йөзү бәхете елмайды. Дельфинарийда булганнан соң, кафега да кереп сыйланды бишенчеләр. Беренче яртыеллыкта Тәрбия рейтингында 3 урын яулап, Чаллы шәһәренә экскурсия белән бүләкләнгән иде алар!

"Созвездие-Йолдызлык" фестиваленең зона сайлап алу турында чыгыш ясап, гимназиябезнең 5В сыйныф укучысы Гөлинә Закирова “Вокал-соло” номинациясендә III урын яулады һәм финалда чыгыш ясау хокукына ия булды. Җитәкчесе – Чекалина Гүзәлия Фирдәвес кызы.

Тәрбия буенча эксперт, тәҗрибәле педагог-психолог Евгений Исаченко (Женя абый) бүген гимназиябездә кунакта. Иң элек, Евгений Исаченко 4 сыйныф укучылары белән очрашты. Яхшылык, яманлык, сайлау мөмкинлеге, дуслашу серләре буенча җанлы әңгәмә корды алар.
Женя абый - легендар педагогика классигы Шалва Амонашвилиның сертификатланган шәкерте, "гуманлы педагогика Рыцары" исеменә ия, Белорус гуманлы педагогика үзәге рәисе. Ул шулай ук ата-аналар мәктәбе җитәкчесе, күпсанлы белем бирү программаларын (шәхси мәктәп, фестивальләр, социаль проектлар, гаилә лагерьлары) оештыручы, гаиләләргә ярдәм күрсәтүче консультант.

ЮИД хәрәкәтенең 50 еллыгына багышланган чарада гимназиябезнең "Ялкын" балалар оешмасының "Светофор" яшь юл хәрәкәте инспекторлары да катнашты. Педагог-оештыручылар Алсу Мирзамәхмүт кызы Хафизова һәм Миләүшә Рәдис кызы Аграпова Актаныш районы буенча ЮХИДИ оешмасының Рәхмәт хатлары белән бүләкләнделәр. Котлыйбыз!

Рус теле hәм әдәбияты атналыгы кысаларында 7 сыйныф укучылары арасында "Үз уен" ("Своя игра") әдәби викторинасы узды. Урыннар түбәндәгечә:
1 урын - 7А сыйныфы,
2 урын - 7Б сыйныфы,
3 урын - 7В сыйныфы.

Җанатарлар командасы да бик актив катнашты.

Татнетны үстерү фонды оештырган "Әдип сүзе" проектында актив катнашып, гимназиябезнең педагог-китапханәчесе Исламова Эльвира Мәүлетдин кызы җиңүче дипломына ия булды.

Герой-шагыйрь Муса Җәлилнең иҗатына багышланган «Кызыл ромашка» шигырь укучылар I республика конкурсында катнашып, гимназиябезнең 2А сыйныф укучылары Диана Гарипова, Румия Шәрипова (җитәкчеләре Сөмәя Тәлгать кызы Муллаярова), 2Б сыйныф укучылары Ильяс Вәгыйзов, Камилә Габделгалиева (җитәкчеләре Светлана Риф кызы Шәйхуллина), 3Б сыйныф укучысы Зәлинә Хаҗиева (җитәкчесе Айгөл Данис кызы Зиннурова) “Нәфис сүз” номинациясендә җиңү яуладылар.

Татар кызлары элек-электән чибәрлекләре, тыйнак, уңган, озын толымлы булулары белән дан тотканнар. Безнең кызларыбыз да нәкъ шундыйлар! Интернатыбызда тәрбияче Исламова Зөлфия Зәет кызы үткәргән "Озын толым" конкурсында кызларыбызны актив катнашты.

8В сыйныф укучылары 23 февраль - Ватанны саклаучылар көне белән 8 Март - Халыкара хатын-кызлар көнен күңелле уеннар уйнап, биеп, җырлап, дустанә аралашып билгеләп үттеләр.