Татар халкының милли бәйрәмнәре арасында Уңыш бәйрәме - "Сөмбелә" үзенең лаеклы урынын алып тора. Исеменнән күренгәнчә, көзге мул уңышны җыеп, туплап бетергәннән соң үткәрелгән, милли гореф-гадәтләргә нигезләнгән бу бәйрәм борынгыдан килә. Әлбәттә "Сабантуй" кебек халык арасында бик үк популяр булмаса да, татар мәктәпләрендә, бигрәк тә, авыл мәктәпләрендә ул укучыларның яраткан бәйрәме. 

  Бүген "Сөмбелә" бәйрәме Ачасыр мәктәбендә дә шаулап-гөрләп узды. Алдагы еллардагы кебек мул табын артында узмаса да, бәйрәм үзенең күркәмлеген югалтмады, күтәренке кәефтә узды. Бәйрәмгә әзерлек берничә атна барды. Һәр класс газета чыгарды, яшелчәгә яклау-реклама әзерләде, җәен мәктәп бакчасында башкарган тәҗрибә эшләрен тәкъдим итте, матур чыгышлар әзерләде. Бәйрәмчә бизәлгән зал, яшелчәләрдән күргәзмәләр, композицияләр кичәбезгә тагы да ямь өстәде. Бәйрәм сценариясе бик кызыклы төзелгән иде, шунлыктан Уңыш бәйрәме бер мизгелдә сизелмичә узып китте. Ачасыр мәктәбендә талантлы укучылар күп шул, ул 11 ләрнең "Татар ашлары" телепрограммасына нигезләнеп кабакны яклап әзерләгән чыгышлары, 7 ләрнең  чөгендерне мактап җырлаган такмаклары, 8 ләрнең мәзәкләре, 9 ларның дәртле биюләре бәйрәмне тагы да җанландырды. Бәйрәм соңында жюри нәтиҗәләр ясап, грамоталар, истәлекле бүләкләр һәм баллы тәм-томны һәр класска тапшырды. Җиңүчеләр булып 7 һәм 11 класс укучылары табылды. Ахырда 8-11 ләр өчен дискотека булды. Шулай итеп чираттагы бәйрәм артта калды. Алда чирекнең соңгы атнасы һәм каникуллар...