“БЕЗ”  бөтенрәсәй бәйгесендә җиңүче!

Син үзеңне телеэфир йолдызы итеп күрәсең, үзеңнең фотоларыңны матур газета һәм журнал битләрендә күрергә телисең, радиода ди-джей булып эшлисең килә һәм син үзеңне чын журналист итеп тоясың икән, әлбәттә инде, син “МедиаПокорение” дип исемләнгән бөтенрәсәй балалар һәм яшьләрнең массакүләм матбугат чаралары фестивалендә катнашырга тиешсең. Чөнки бу фестиваль нәкъ әнә шундый яшьләр өчен оештырылган да. Без дә үзебезне мондый балалар рәтендә күреп, мәктәбездә чыгып килүче “БЕЗ” газетабыз белән бу бәйгедә катнашып карарга булдык. Газетабыз әле бу уку елында яңа гына чыга башлаганга без ниндидер җиңүгә ышанмаган да идек. Әмма 18 март көнне Чаллы шәһрендә үтәчәк фестивалгә чакыру алгач, без бер дә икеләнмичә, укытучыбыз һәм газетабызның җитәкчесе Марат Гомәрович белән юлга кузгалдык. Чаллы шәһәренә чыгып китүе бераз куркытып торса да, ниндидер сихри көч безне рухландырып торды һәм бернинди дә курку да, борчу да калмады.

Казан дәүләт федераль университетының Чаллы шәһәрендәге филиалы оештырган бу бәйге икенче ел гына оештырыла. Бу елда ул беренче тапкыр бөтенрәсәй дәрәҗәсендә үткәрелә. Оештыру комитетына Чаллы, Түбән Кама, Баулы, Чистай, Яшел Үзән, Казан , шәһәр һәм районнары белән беррәттән, Украина, Башкортстан, Удмуртия, Калмыкия, Волгоград, Воронеж, Мәскәү, Архангелский, Сарытау өлкәләреннән барлыгы 170 якын эш җибәрелгән. Номинацияләрнең ниндиләре генә юк: “Иң яхшы телеведине тапшыруы”, “Иң яхшы татар телендәге газета”, “Иң яхшы мәктәп радиосы” һ.б.

Фестивал оештыручылар бу чараны бик матур һәм нәкъ “Оскар” премиясен тапшыру

бәйрәменә охшатып эшләгәннәр. Башта төрле юнәлештәге мастер-класслар да оештырылган иде. Без аларда катнашып, үзебезгә бик күп яңа һәм файдалы  мәгълүматлар алдык. Аннан соң иң күңелле вакытлар җитте: төрле номинацияләрдә җиңүчеләрне бүләкләүләр башланды. Башта мәктәп телевединиеләрен, аерым тапшыруларны бүләкләүләр булды. Аннан газеталарга да чират җитте. Һәм менә жюри әгъзасының  “ III дәрәҗәдәге Диплом белән “Иң яхшы татар телендәге мәктәп газетасы” номинациясендә “БЕЗ” газетасы бүләкләнә” дигәч, ничек итеп урыныбыздан сикереп торып, сәхнәгә йөгереп менүебезне сизми дә калдык. Шатлыгыбыз эчебезгә сыймады. Әлбәттә шушындый зур дәрәҗәдәге бәйгедә безнең газетабызны күрүләре һәм аңа урын бирүләре безнең өчен бик куанычлы булды. Бу фестивалдән без тагын да күбрәк илһамланып, яңа көч, яңа дәрт белән рухланып кайттык. Газетабызны яратлар һәм аны тиешле дәрәҗәдә бәялиләр икән - димәк без дөрес юлда. Киләчәктә дә “БЕЗ” газетасы яшьтәшләребезнең, авылдашларыбызның яратып укый торган газетасы булыр дигән ышанычта калабыз. Ә без үзебезнең сайлаган кыйблабызны югалтмыйча алга барырбыз. Кыскасы, “Без булдырабыз!”

 Гиззатуллина Фирүзә.

Ачасыр урта мәктәбенең

“БЕЗ” газетасы мөхәррире.