Татар поэзиясенә һәм музыкасына нигез салучылар кемнәр дип сорасалар, беренчесе – Тукай, икенчесе – Сәйдәш, дип җавап бирәбез.

Сәйдәш моңнары синең йөрәгеңә үтеп керә дә иң нечкә хисләрне уята. Бөтен барлыгыңны биләп ала, дәртләндерә, ашкындыра, уйландыра. Күңелнең якты омтылышлары якты уйлар белән тула. Сине яшәргә чакыра, хәтта иң зарлы, иң хәсрәтле, күңелне тетрәткән фаҗигале моңнары да яшәүнең мәгънәсен аңларга ярдәм итә.

Татар музыкаль дөньясында тиңдәшсез урын тотучы “Галиябану”, “Зәңгәр шәл”, “Кандыр буе”, “Ил”, “Биш бүләк”, “Сүнмәс йолдызлар”, “Наемщик” драмаларына музыка язып, Сәйдәшев үз милләтенең, үз мәдәниятенең үсешенә кабатланмас зур өлеш керткән бөек шәхес. Татар дөньясы 2010 елда шушы бөек шәхеснең тууына 110 ел тулуны билгеләп үтте. Безнең Ачасыр урта мәктәбе коллективы да бу чарадан читтә кала алмады һәм 15 нче декабрь көнне “Син-кояшлы җырлар иҗатчысы” дип исемләнгән әдәби-музыкаль кичә үткәрде. Кичәдә С.Сәйдәшевнең көйләре яңгырады, аның фаҗигале тормыш юлы, иҗаты турында бик кызыклы һәм файдалы мәгълүматлар бирелде. Укучылар тарафыннан композиторның тормышын һәм иҗат эшчәнлеген чагылдырган стена газетасы чыгарылды. Шулай ук, укучылар аңа багышлап язылган шигырьләр укыдылар, җырларын җырладылар. Гомумән, кичә бик файдалы һәм кызыклы үтте.

Әйе, Салих Сәйдәшев- татар халкының иң  сөекле композиторы, тугрылыклы улы. Халыкның рухи байлыгын үстерүгә ул үзеннән зур өлеш кертте. Аның музыкаль әсәрләре картаймыйлар һәм искермиләр. Алар бүген дә безнең белән бергә яшиләр. Халыкка эштә, ялда юлдаш булып баралар, аның шатлыгын да, кайгысын да уртаклашалар.

Сүземне әдәби кичәбезнең эпиграфы булып торган М.Хөсәеннең шигырь юллары белән тәмамлыйсым килә:

  Син-кояшлы җырлар иҗатчысы

  Тукае син көйле дөньяның

  Рәхмәт сиңа рухландырган өчен,

  Эшкә хирыс халкың улларын.

  Мәңге үлмәс моңнар бүләк иттек,

  Арабызда бергә сайрашып.

  Халык мәхәббәте лауреаты –

  Сөеклебез Салих Сәйдәшев.