Минем сүзем-минем көзгем

21 февраль көнне Матюшино мәктәбендә Россия халыкларының халык сәнгате һәм мәдәни мирасы елы кысаларында, Халыкара туган тел көнендә тематик чаралар үткәрелде.

          Матюшино авыл китапханәсе мөдире Лилия Садеева һәм башлангыч сыйныф укытучылары Лилия Гузәлбаева һәм Алсу Арсланова башлангыч сыйныф укучылары өчен «Минем сүзем – минем көзгем»дигән лингвистик уен үткәрделәр. Уен берничә турда узды: «Разминка», «Артык сүзне тап», «Ералаш», «Төшеп калган хәрефләр», «Шифровка», «Кем тизрәк», «Ребуслар бир». Уенда төрле милләт балалары катнашса да, алар барлык биремнәрне дә бик яхшы башкардылар. Чара ахырында Г.Тукайның «И туган тел» шигырен тыңладылар.

Урта һәм өлкән сыйныф укучылары өчен татар теле һәм әдәбияты укытучысы Раушания Васильевна «Туган тел көне» дигән класстан тыш чара үткәрде. Бу чарада укытучы балаларга әлеге истәлекле дата тарихыннан бик күп кызыклы нәрсәләр сөйләде. Балалар туган тел, Туган Ил, ана турында мәкальләр һәм мәкальләр сөйләделәр, Туган тел турында шигырьләр сөйләделәр, кроссворд чиштеләр.

Барлык чаралар да яхшы дәрәҗәдә, укучыларның актив катнашында үтте. Мондый чаралар балаларны әдәби мираска җәлеп итү өчен бик мөһим һәм кирәк.