“Мәктәп эшмәкәр-компанияләре” семинары

24-27нче февраль көннәрендә Матюшино гомуми урта мәктәбенең 8нче сыйныф укучылары Ф.Арсланова, Я. Гаделшина, А. Гүзәлбаев, И. Садеев укытучылары Лилия Гүзәлбаева җитәкчелегендә “Байтик” балалар лагеренда үткәрелгән мәктәп эшмәкәр-компанияләренең семинарында катнаштылар. Бу чараны оештыручы – Казандагы укучыларны эшмәкәрлеккә өйрәтүче “Яшьләр казанышы” үзәге. Өч көн дәвамында укучылар бизнес-план төзергә, эшмәкәрлек һәм реклама серләренә өйрәнделәр. Һәр команданың эш нәтиҗәсе булып компетентлы жюрига үзеңнең эшмәкәрлек проектыңны презентацияләү булды. Балалар галстук һәм браслетлар җитештерү, чәчәк һәм яшелчә үсентеләрен сату турында проектлар күрсәттеләр. Безнең команда “Бакча -Сарай авылында ял” дигән проектны тәкъдим итте. Авыл җирлегендә туризмны үстерүне популярлаштыруда актив катнашканы өчен “Яшьләр казанышы” үзәге директоры Ләлә Бикчәнтәева безнең мәктәп командасын сертификат белән бүләкләде. Без укучыларыбызга киләчәктә үзләренең бизнес-проектларын тормышка ашыруда уңышлар теләп калабыз!