25 март көнне 8 сыйныф укучылары , үзләренең сыйныф җитәкчесе Ибраева З.Г. белән  Саба аграр көллиятендә булдылар. Экскурсия барышында алар көллиятнең нинди белгечлекләр әзерләвен белделәр, уку-яшәү шартлары белән таныштылар. Уку йорты турындагы барлык мәгълүмат белән, биналар эчендәге экскурсия белән дә,  көллият җитәкчесе Бикмухаметов Закирҗан Миннемул улы үзе таныштырды, үзе сөйләде.
Көллият механикларны һәм бухгалтер-икътисадчыларны, автомеханикларны, төзүчеләрне һәм программистларны, сервис техник хезмәте күрсәтү осталарын, авыл хуҗалыгы җитештерүенең машина йөртүче-тракторчыларын, электр белән эретеп ябыштыручыларны, пешекче-кулинарларны, персональ компьютерлардан файдаланучыларны әзерләп чыгара.
Уңышлы укыту-җитештерү процессы өчен барлык шартлар да тудырылган, кабинетлар мультимедиа җиһазлары белән җиһазландырылган. Укучылар карамагында-укыту-тәҗрибә һәм хуҗалык участоклары, спорт залы, техник хезмәт һәм машина белеме остаханәләре, хезмәт күрсәтү кабинеты, компьютер классы, автотренажер кабинеты бар. Студентлар машина йөртүдә башлангыч күнекмәләр алалар. Ике зур хуҗалыкта производство практикасы узалар һәм яңа техниканы үзләштерергә өйрәнәләр.
Уку корпусы янында студентлар өчен тулай торак бинасы урнашкан. Бүлмәләрдә яшәү өчен кирәкле бөтен нәрсә бар. Уку,  тулай торакта яшәү, өч тапкыр ашау өчен түләү алынмый. Моннан тыш, мәдәни-массакүләм һәм спорт чаралары өчен-заманча җиһазлар куелган актлар залы, милли көрәш, өстәл теннисы, бильярд секцияләрендә шөгыльләнү өчен спорт залларыбар, вокал һәм хореография студияләре эшли.
Көллияттә өч йөзгә якын студент белем ала. Белем бирү бюджет нигезендә рус телендә бирелә. Укыту сыйфатын һәм укучыларның өлгерешен бәяләүнең рейтинг системасы кертелгән. Һәр семестр имтиханнар һәм зачетлар, курс эшләре, производство практикасы материаллары тапшыруны үз эченә алган арадаш аттестация белән тәмамлана. Ә уку срогы тәмамлангач, белгечлек буенча дисциплинаара имтихан рәвешендә йомгаклау дәүләт аттестациясе үткәрелә.
Укучылар бик кызыксынып, күп мәгълүмат алып кайттылар. Киләчәктә шушы уку йортында белем алырга теләүчеләр дә  булды.