Бүген Теләче урта мәктәбендә Дөньякүләм «Татарча диктант» акциясе узды. Акциянең төп максаты – татар теленә һәм мәдәниятенә игътибар җәлеп итү, дөнья буенча таралып яшәгән татарларны берләштерү, тел белемен тикшерергә мөмкинлек бирү, әдәби татар телен кулланучыларның даирәсен арттыру һәм татар теленә карата мәхәббәт уяту. Быел «Татарча диктант» акциясе тугызынчы тапкыр оештырылды. Акция бүгенге көндә Татарстан Республикасы, Россия Федерациясе һәм чит илләрдә яшәүче милләттәшләребезне берләштерә торган проектларның берсе. «Татарча диктант» акциясенең трансляциясе 8-10 ноябрь көннәрендә «ТНВТатарстан», «ТНВ-Планета» телеканалларында күрсәтелә һәм «Болгар радиосы»нда яңгырый. Елдагы традиция буенча «Татарча диктант»ны Теләче урта мәктәбендә дә яздык. Диктантны Район мәгариф бүлеге җитәкчесе Карпова Наталья Владимировна, милли белем бирү буенча методист Сахабиева Гөлфинә Мидхәт кызы һәм барлык теләге булган райондашларыбыз язды. Быелгы диктант тексты итеп, Шәриф Камал язмасында, «Матур туганда» романыннан 210 сүздән торган өзек алынган иде. Диктант билгеләрен https://diktant.tatar/ адресы буенча төгәл бер айдан соң белеп булачак.