24 октябрь көнне  Иске Җөри авылы мәдәният йортында  Иске Җөри  урта гомуми белем бирү мәктәбе  район  мәгариф бүлеге  белән  берлектә   Татарстан  Республикасы  төзелүгә 100 ел тулу уӊаеннан 8-9 сыйныф укучылары өчен “Зирәкләр - тапкырлар” (Умники и умницы) дип исемләгән район бәйгесен  уздырды.

  Конкурсны уздыруның төп максатлары түбәндәгеләр иде:

·        укучыларда  Татарстан  һәм татар  халкы  тарихын, туган  як  тарихын  өйрәнүгә  кызыксыну тудыру;

·        Татарстан  һәм татар халкының тарихын, мәдәниятен саклау һәм үстерү;

·        Укучыларны   иҗади - эзләнү  эшенә  җәлеп  итү.

 Әлеге бәйгенең район турына  үз мәктәпләрендә  җиңү яулаган 12 укучы көч сынашты. Алар Татарстан тарихы һәм татар халкы буенча

бирергән сорауларга тиз арада  һәм төгәл итеп җавап бирергә тиеш иделәр. Бәйгене Иске Җөри урта мәктәбенең тарих укытучысы Зәйнетдинова Диләрә Хәниф кызы алып барды. Финалга 5 укучы үтте. Алар Иске Җөри урта мәктәбеннән Руфия Мортазина (җитәкчесе Диләрә Зәйнетдинова),Үзәк урта мәктәбеннән  Гөлназ Мөбәракшина ( җитәкчесе Венера Хәсәншина), Баландыш төп мәктәбеннән Айгөл Гарипова (җитәкчесе Элеонора Гыйлаҗева), Олы Нырсы  урта мәктәбеннән Динә Шәйхетдинова (җитәкчесе Лариса Хәлилова) һәм Олы Мәтәскә урта мәктәбеннән Данис Нигъмәтҗанов (җитәкчесе Диләрә Бикчәнтәева).

          Бәйгедә 1 урынны Данис Нигъмәтҗанов, 2 урынны Динә Шәйхетдинова, 3 урынны Айгөл  Гарипова  яулады. Җиңүчеләргә бүләкләрне мәгариф бүлеге җитәкчесе Карпова  Наталья  Владимировна һәм социаль мәсьәләләр буенча район башлыгы урынбасары Нурмөхәммәтов Азат  Әнәс улы тапшырды.