Теләченең беренче номерлы балалар бакчасында “Теләчем – туган ягым” атналыгы булып узды. Атна дәвамында балалар туган як, Теләче төбәге турындагы белемнәрен үстерделәр, районның барлыкка килү тарихы белән таныштылар. Балалар презентация аша Теләче үзәгендә урнашкан биналарны, бакчада тәрбиячеләр эшләгән Теләченең үзәк урамы һәм беренче номерлы балалар бакчасы ясалган макетны карадылар. Мәктәпкәчә яшьтәгеләр төркеменә йөрүче балалар үзләренең музейга сәяхәтләре , паркта күргәннәре, мәдәният йортында ясаган чыгышлары турында бик тәэсирләнеп сөйләделәр. Балаларда Теләче төбәгеннән чыккан күренекле шәхесләр: язучылар, театр артислары, җырчылар, аларның иҗатлары аеруча кызыксыну уятты, якташ җырчылар башкаруында җырлар тыңладылар.