21 март көнне бакчабызда язны каршылап, язгы чәчү эшләре алдыннан уткәрелә торган борынгыдан килгән күркәм бәйрәмебез - Нәүрүз үткәрелде. Тәрбиячеләр һәм балалар катнашындагы әлеге бәйрәмне бакчабызның музыкаль җитәкчеләре алып барды.Иң элек, бәйрәмне оештыручылар Нәүрүз, аның тарихы турында тәфсилләп сөйләде. Билгеле булганча, борынгы бабаларыбыз Яңа елны ике тапкыр: декабрь аенда – Нардуган һәм язың - 21-22 мартында, көн белән төн тигезләшкән вакытта, Нәүрүзне бәйрәм итә торган булганнар.

Гадәт буенча, Нәүрүз көнне иртә таңнан яшьләр урамга чыккан. Ул көнне өйдән-өйгә кереп "Нәурүз" әйтү гадәте булган. Нәүрүз такмагын әйтеп, хуҗаларга бәхет, уңышлар теләп йөргәннәр. Бу күңелле мәҗлесне балалар да башкарды: бакчада махсус оештырылган өйләргә кереп, Нәүрүз бәйрәме белән котладылар, ә өй хуҗабикәләре аларга күчтәнәч итеп май, он, йомырка, сөт, тоз бирделәр. Аннан котлаулар балалар башкаруында жыр-бию, шигырьләргә алышынды. Уен барышында Язбикә образы белән таныштылар, ул биргән табышмакларга бергәләшеп җавап эзләделәр.

Бәйрәмнең дәвамы урамда, саф һавада узды. Биредә балалар төрле уеннарда катнаштылар. Бәйрәм ахырында тәмле коймаклардан авыз иттеләр. Нәүрүз мөбәрәк булсын!