1 июнь балаларны яклау көнендә Олы Нырсы балалар бакчасында тәрбияләнүче балалар өчен зур бәйрәм булды. Әлеге матур көнне без үзенчәлекле итәргә уйлап, балалар өчен милли бәйрәмебез - САБАНТУЙ үткәрдек. Әлеге бәйрәмне балаларны халкыбызның гореф-гадәтләре белән тирәнтен таныштыру, үзара дуслашу һәм берләштерү, уеннар аша сөйләм телен үстерү, сәламәт яшәү рәвешен пропагандалау, милли спорт уеннарына кызыксыну уяту максатыннан оештырдык. Балалар “Калак белән йомырка ташу”, “ Чүлмәк вату”, “Капчык киеп йөгерү”, “Таяк тартышу”, “Аркан тарту”, “Көрәш” кебек уеннарда катнашып күңел ачтылар. Бәйрәмдә бер бала да бүләксез калмады, әти-әниләре, бакча мөдире, мәдәният хезмәткәрләре ярдәме белән тупланган бүләкләр сабантуй рухын тагы да күәтләп күңелләрне күтәрде. Әлеге чара балалар күңелендә озак сакланыр дигән теләктә калабыз.