Утның кешеләр тормышындагы урыны, аның файдасы һәм җимергеч көче, янгын сүндерүчеләр һөнәре - мәктәпкәчә чордагы бала белергә тиешле бурычлар. Көнкүрештә янгын куркынычсызлыгының элементар нормаларын балага кече яшьтән үк өйрәтергә кирәк. Шул максатны күздә тотып, тәрбияче апалары белән балалар гадәттән тыш хәлләр бүлекчәсенә бардылар. Алар анда янгын сүндерү машинасын, аңа утырып, янгын сүндерүчеләрнең кирәкле җиргә барып җиткәч, нинди кораллар кулланулары, ничек су сиптерүләре турында белгәннәр. Абыйлары утның куркыныч көч булуы, саксыз кулланганда коточкыч фаҗигаләргә китерүе турында сөйләгән, мисаллар китергән. Балалар очрашудан канәгать калдылар. Бер-берсенә сак булырга, шырпы белән уйнамаска, өлкәннәрдән башка өйдәге электр әйберләрен кабызмаска сүз бирделәр.