Җ әй–төгәлләнгән уку елы  һәм алдагысы  арасындагы  үзенә күрә бер күперчек ул.  Җәй–ул, барыннан да бигрәк, җылы һәм кояшлы көннәр. Әлбәттә,  “яңгыравыклы” җәйнең  әзер рецепты юк, шулай да безнең укытучылар яхшы кәеф һәм үзара аңлашуның шатлыклы җәйнең нигезе икәненә инанып эш иттеләр. Тәрбиячеләребез Иске Дөреш төп гомуми белем бирү мәктәбе укытучылары  Габсаматова Ф.Х., Фәрхетдинова Р.Х., Сәйфетдинова Л.Ш., Миннахметова Р.Х., Халиуллина З.К., Харисова Д. Ш., Хафизова Г.Ә. булдылар. "Ак каен" мәктәп яны сәламәтләндерү лагеренда 21 көн буена җиде яшьтән алып унике яшькә кадәрге 22 бала ял итте һәм үз сәламәтлекләрен ныгытты. Балалар бирегә бик теләп йөрделәр. Чөнки аларның ялы үзенчәлекле, эчтәлекле һәм күңелле үтте. Көндәлек режим ял итүчеләр һәрчак шөгыльле булырлык итеп төзелгән иде. Иртәләребез зарядка белән башланып китте, ачык һавада төрледән-төрле уеннар оештырылды, табигать кочагына, авылыбыз урманнарына экскурсияләргә бардык. Бу ял хезмәт белән үрелеп барды. Чишмә территориясе җыештырылды, балалар көче  белән дару үләннәре җыелды.

Лагерьда ял итү, күптән көтелгән зур вакыйга, Казанда "Универсиада 2013" җәйге спорт уеннары белән тәңгәл килде. Шул уңайдан, без дә лагерьда кече универсиада үткәрдек, универсиада яңалыклары белән даими танышып бардык. Тәрбиячеләребез балаларны нинди генә спорт төрләрендә сынап карамадылар. Укучыларыбыз  шахмат турнирында, җиңел атлетика, бадминтон, волейбол һәм футбол буенча спорт ярышларында бик  теләп катнаштылар.
           Җәйге мәктәп яны лагере ата-аналар өчен дә бик уңайлы булды. Балалар да, әти-әниләр дә канәгать калдылар.  Беренчедән, бала – күзәтү астында булды, икенчедән, балалар замана чире – компьютердан аерылып, виртуаль дөньядан чын тормыш казанында яшьтәшләре арасында кайнап яшәделәр: кояшта кызындылар, ял иттеләр, тәмле итеп ашадылар һәм көннәрен файдалы итеп үткәрделәр.