Без, 1 һәм 3 нче класс укучылары , Мусабай-Завод авылында яшәүче Гайнетдинова Рузалия апага булышабыз. Ул-инвалид, йөри һәм сөйләшә алмый. Рузалия апа моңаеп утырмый: “Күңел” радиосын яратып тыңлый, газетадагы яңалыклар белән таныша, матур итеп чигә. Без аның батырлыгына сокланабыз. Шушы матур сыйфатларны ул балаларда тәрбияләргә тырыша. Безнең укучылар аның янына кергәч, үзләренең осталыкларын күрсәтәләр: шигырьләр сөйлиләр, җырлыйлар. Соңыннан үзләре ясап кергән төрледән-төрле аппликацияләрен Рузалия апага бүләк итәләр. Шулай ук ул көндәлек алып бара. Бу көндәлектә үзенең кичерешләрен, балаларга, укытучыларга, гомумән, барлык кешеләргә теләкләрен, рәхмәтен яза. Без аны бергәләп укыйбыз һәм барыбызга да бик рәхәт була. Шушы көннәрдә генә аның 65 еллык юбилее булып узды. Без аны туган көне белән котладык һәм үзебезнең шигъри бүләкләребезне тапшырдык. Ул бик шатланды, үзенең чиксез зур рәхмәтен белдерде.