“Һәркемнең гомере бер генә,

  Яхшылык эшләргә ашыгыйк”.  ( Ф.Яруллин)

Нәрсә ул яхшылык, һәм шәфкатьлелек? Бу сүзләрнең мәгънәсе нидә? Уйлап карасак, шәфкатьлелек - бер-береңә ярдәмгә килергә әзер булу, якын кешең өчен үзеңне,  үзеңнең хис-тойгыларыңны корбанга китерүдер мөгаен, гомумән, чын күңелдән эчкерсез яхшылык кылу, авыр хәлдә калучыларга битараф булмау кирәк.

22нче декабрь  көнне гомум мәктәп Яхшылык Дәресе үткәрелде. Монда «Один в темноте» кебек социаль роликлар белән таныштык. 9нчы сыйныф укучылары үз фикерләрен, бик нык саклык һәм тирәнтен фикерләп әйттеләр. Аларны барлык укучылар да, укытучылар да телдән калып тыңладылар. Шулай ук атна буена, сыйныф җитәкчеләре : “Учымдагы сүз...”, “Яхшылык кыл”, “Йөрәгеңне яхшылыкка  өйрәт” исемле сыйныф сәгатьләре үткәрделәр. “Учымдагы сүз...” уенын уйнадылар. Уенның асылы, күзләрен яулык белән томалап бер-бере белән аңлашу иде. Укучылар үзидарәсе яхшылык турында мәкальләр, шигырьләр туплаган стенгазета чыгардылар. Тәнәфесләрдә мәктәп радиосы аша «Если добрый ты…», «Дорогою добра» җырларын тыңладык.

 Барыбыз да яхшылыкка мохтаҗ,

 Бу заманда бигрәк.

Яхшылыкны эшләү җиңел түгел,

 Ә эшләргә кирәк!