4-5 апрельдә Мамадыш районында татарча көрәш буенча I мәктәп Спартакиадасының республика финал этабы ярышлары үтте. Анда безнең Иске Рәҗәп урта мәктәбенең 5 яшь көрәшчесе катнашты. Көрәш ярышлары Олимпия уеннары системасы буенча үткәрелде. Безнең егетләребез призлы урыннар ала алмасалар да, әлеге бәйге алар өчен файдалы булды: көрәш алымнарын үзләштерергә, үзеңнең көндәшеңнең яхшы сыйфатларын өйрәнергә, көрәш кагыйдәләрен төгәл үтәргә кирәклеген тагын бер тапкыр искәртте.

  Егетләребез яңа дуслар таптылар, Мамадыш шәһәре, авыллары белән таныштылар, профессиональ колледж укучыларының концерт номерларын тыңладылар.

   Көрәш ярышлары көрәшчеләребезгә көч өстәде, алдагы ярышларга хәзерләнгәндә кимчелекләрне кабатламаска, үз-үзеңә ышанырга, физик яктан даими чыныгып торырга кирәклеген исбатлады. Афәрин, егетләр! Алдагы ярышларда сезгә уңышлар, сынатмаска!