Әфган сугышы... Бу коточкыч вакыйгаларга нокта куелган 1989 нчы елның 15 нче февраль көненнән соң нәкъ 25 ел вакыт узып киткән. 15 нче февраль – Россиядә интернационалист сугышчыларны искә алу көне итеп үткәрелә. Шул уңайдан мәктәптә “Язмыштан узмыш юк” исеме астында Әфганстан сугышында катнашкан аылдашлар һәм райондашларыбыз истәлегенә багышлап кичә үткәрдек. Кичәне җәмгыять белеме укытучысы Флюра Миннасых кызы Гарәфетдинова оештырды. Кичәдә Әфган сугышына багышланган шигырьләр укылды,җырлар җырланды, кинолардан өзекләр күрсәтелде. Укучылар сугышта булган авылдашлары турында  сөйләделәр.

Шушы мәктәпне тәмамлаган 16 егет Әфгәнстан сугышында катнаша. Барысы да исән-сау туган авылларына әйләнеп кайталар. Алар арасыннан авылда Рәис Харис улы Минсафин гына яши. Калганнары Яр Чаллы, Түбән Кама һ.б. шәһәрләрдә яшиләр. Әфган сугышчылары турында җыелган материалны җирле музейга альбом ясап тапшырдык.

Әфган сугышы барлык милләт кешеләре өчен дә уртак. Һәр шәһәр, район, авылга кагылган аның рәхимсез җиле. Күп йортларга кергән аның кайгысы. Бу афәт күпме яшь гомерләрне өзде, әти-әниләренә гомерлек кайгы китерде. Исән-сау кайтучылар бәхетле, тик шулай да аларның да матур еллары сугышта үткән, ул көннәр тормышларында иң авыр хатирәләр булып калырлар.

Сугышта катнашучылар гына түгел, без, бүгенге яшьләр, һәм киләчәк буын кешеләре дә бу вакыйганы онытырга тиеш түгел. Көннәр тыныч, күкләребез аяз булып, атыш, шартлау тавышларын ишетмичә яшәргә язсын иде. Киләчәктә җир йөзендә сугышлар кабатланмасын!