Ял да итәләр, акча да эшлиләр...

-Мәктәпнең ярдәмче хуҗалыгы элек тә зур иде. Хәзер дә хәлдән килгән кадәр мал асрарга тырышабыз. Моның файдасын үз мисалыбызда күрәбез. Мәсәлән ашханәгә яшелчә яки итне беркайчан да читтән  сатып алганыбыыз юк – үзебез җитештергән продукцияне кулланабыз. Быел бәрәңгене дә алтмыш сутыйга утырттык. Яңгырлар булмаса да “Икенче икмәк” әйбәт уңыш бирергә тиеш. Чөнки барысын да тырышып эшләдек – башта чүп үләннәрен кырып чыктык, аннары әйбәтләп өйдек. Кишер, чөгендер, кәбестә , помидорлар өлгереп килә. Фермада савым сыер, мөгезле эре терлекләр, сарыклар, күп итеп куяннар асрыйбыз. Кыскасы укытучыларның һәм укучыларның  эш-мәшәкатьләре җитәрлек. Мәктәптә укучыларның хезмәт тәрбиясенә элек-электән зур игътибар бирелде. Язын һәм җәен мәктәп бакчасында  да эш күп, малларга азык та әзерләргә кирәк. Шуңа күрә , узган еллардагы кебек, укучыларны эш белән тәэмин итү өчен махсус килешүләр төзедек. Июнь аенда егерме биш укучы  эшләргә теләк белдерсә, июльдә егерме дүрт укучы. Аларның аз булса да акча эшләп аласы килә.