Авылыбызда сирәк кенә булса да гармун тавышлары ишетелә.Гармун  олысын, кечесен үзенең моңнары белән тартып тора.Кая моң, шунда матурлык.

Бүген мәктәпкә  Солтан Шиһапов кунакка килде. Аның осталыгына  исләрең китәрлек. Ул төрле уен коралларында уйнап виртуозлыгын күрсәтте. Татар милләтенең мәдәниятын баетуга зур өлеш керткән композитор Ифрат Хисамов ясаган курайда уйнады. Артист шулай ук быел  тарихи архитектура елына басым ясап үтте. Ул татар халкының үзенең культурасын гына түгел, аның белән бергә янәшәдә атлаучы чуаш, мари, рус халкының да мәдәниятын яратып өйрәнергә өндәде. Солтан абый  чуашча, марича, русча да җырлап күрсәтте. Сорнай уен коралы элек хезмәт ролен уйнаган икән, иртә белән көтүгә көтүче халыкны сорнай тавышына уяткан, кайтырга вакыт җиткәч, сорнайда уйнап көтүне авылга алып кайткан. Солтан абый  сәхнәдә балаларны чакырып татар, рус көйләренә төрле элементлар ясап биетеп тә алды. Концертта ул саратов, тальян гармуннарда, баянда, авыз гармунында  уйнап укучыларның һәм укытучыларның кәефләрен күтәрде.

Солтан абыйга киләчәктә иҗади уңышлар теләп, киләсе очрашуларга кадәр дип озатып калдык.