10 нчы сентябрь көнне " Азино" микрорайонында узган " Изгелек атнасына" багышланган ярминкәдә гимназия укучылары да актив катнашты. Укучылар көче белән тупланган кул эшләре хәтта Казан мэры Илсур Метшинны да кызыксындырды. Ул безнең өстәл янына килеп укучылар белән  аралашып,бер кул эшен сатып алды. Соңыннан укучыларыбыз Илсур Раисовичка  гимназия директоры Рәхимә Арсланованың " Әкиятләр" китабын бүләк  иттеләр. ( фотода)

15 нче сентябрь - Абдулла Алишның туган көне.

 Шул уңайдан гимназиядә төрле чаралар, кызыклы очрашулар үткәрелә башлады. 9 нчы сентябрь көнне  Латвиянең Юрмала шәһәрендә яшәүче, Абдулла Алишның энесе-Галимҗан Алишевның кызы Фәридә Алишева  белән " Алиш варислары" музеенда  очрашу узды. Укучылар  Фәридә ханымның һәрбер сүзен,үгет-нәсыйхәтен игътибар белән тыңлап, аңа төрле сораулар бирделәр, соңыннан бергәләп фотога төштеләр.

8 сентябрь көнне гимназиядә " Изгелек атнасы" уңаеннан ярминкә узды. Ярминкәдә укучылар гына түгел, аларның әти-әниләре дә  актив катнашты. Һәр сыйныф ярыша-ярыша   кул эшләрен, төрле тәм-томнар саттылар.Гимназия укучылары җыелган акчаларны гимназиядә укый торган мохтаҗ гаиләләргә тараттылар. Бер укучыбызның август аенда йортлары янган булган, икенче укучыбызның сәламәтлегенә зыян килгән. Аларның гаиләләре ярдәмгә мохтаҗ булганга, җыелган акчаларны укучылар шул гаиләләргә тапшырдылар.

Укучылар, һәрвакытта күбрәк изге гамәлләр, игелекле эшләр кылырга ашыгыгыз!

Хөрмәтле, әти-әниләр!

9 нчы сентябрь көнне сәгать 17. 00  зур актлар залында гомуммәктәп ата-аналар җыелышы узачак.

            Көн тәртибендә:

1. Укучыларның сәламләве.

2. 2015-2016 нчы уку елына нәтиҗәләр. Яңа уку елына план һәм куелган бурычлар: проблема һәм перспективалар.

3.Куркынычсызлык кагыйдәләре, антитеррор һәм ата-аналардан акча җыюны тыйган   инструктив хатлар, боерыклар  белән танышу.

4. Гимназия Уставының таләпләре.

5.Гимназиянең эчке эшчәнлек тәртибе белән танышу.

6. Дәреслекләр белән тәэмин ителү.

7.Төрлесеннән.

  6 сентябрь көнне " Изгелек атнасы" уңаеннан гимназиягә Татарстан Республикасы  Президенты  аппаратыннан  Нурия Миннәхмәт кызы Хәшимова килеп, укучылар белән очрашу үткәрде. Нурия Миннәхмәтовна  танылган хәйрияче Әсгать Галимҗановның игелекле  гамәлләрен искә төшереп, балаларны күбрәк изгелек эшләргә чакырды, сораулар ярдәмендә укучылар белән җылы әңгәмә урнаштырды.  Нурия Хашимова чыгышы ахырында истәлекле бүләкләр таратып, гимназия укучылары белән фотога төште.Очрашу бик  эчтәлекле һәм кызыклы узды.

  5 сентябрь  көнне гимназиядә " Изгелек атнасы" на старт бирелде. Чарада  академик, профессор, Россиянең мәгариф отличнигы, дәреслекләр авторы, КФУ ның кафедра мөдире  Әнвәр Нуриәхмәт улы  Хуҗиәхмәтов, КФУ ның   доценты Садриева  Рәисә Әфтах кызы катнаштылар. Алар укучыларыбызны изге гамәлләр кылырга, тәртипле,олылырга игътибарлы булырга өндәделәр.

  Изгелек атнасында кылган игелекле гамәлләрне һәр сыйныф  Изгелек тартмасына салып барачак.  Гимназия укучылары яхшы эшләрне, изге гамәлләрне  бер атнада  гына түгел, ә ел дәверендә алып барырга сүз бирделәр. Һәр сыйныф Изгелек атнасын билгеле бер шигарь астында уздырачак.

1 нче сентябрь көнне  Россиянең МЧС хезмәткәрләре гимназия укучылары белән куркынычсызлык кагыйдәләрен өйрәнү буенча дәрес үткәрделәр.Укучылар бик күп кызыклы һәм файдалы мәгълүмат алдылар. Эвакуация дә уңышлы гына тәмамланды.

Быел көн болытлы һәм яңгырлы булуга карамастан, Белем бәйрәме бик матур һәм күңелле узды.Чарада Дәүләт Советы депутаты Шафигуллин Л.Н. ышанычлы вәкиле " Таттелеком" хезмәткәре Кузнецова Ольга Анатольевна, МЧС хезмәткәрләре  катнашты.1 нче сыйныфка быел барлыгы 90 укучы кабул ителде. 2016-2017 нче уку елында  гимназиядә 686 бала  татар телендә белем һәм милли тәрбия алачак.

 Укучылар! Сезне Белем бәйрәме белән тәбрик итәбез!  Сезгә яңа Уку елында яңа уңышлар телибез. Һәрвакыт алга,яңа үрләргә омтылыгыз. Кызыклы һәм мавыктыргыч Белем дөньясына рәхим итегез! Хәерле сәгатьтә!

 2016 нчы елның 23 нче августында  Халыклар дуслыгы йортында Россия  Федерациясе төбәкләре милли мәгариф кураторларының, милли мәгариф оешмалары җитәкчеләренең " Мәгариф өлкәсендә төбәкара хезмәттәшлек: аның торышы,проблемалары, перспективалары" тема астында узган  семинар-киңәшмәдә Абдулла Алиш исемендәге  20 нче  гимназия директоры Арсланова Рәхимә Минвәли кызы  Төмән өлкәсенең Чыкчы урта мәктәбе директоры Кәримова Гөлнара Ниазмөхәммәт кызы   милли белем бирү йортлары арасындагы хезмәттәшлекне имзалар  белән ныгыттылар.

Бу хезмәттәшлек дәвамлы һәм нәтиҗәле булсын иде дигән теләктә калып, уңышлар телибез!

1944 нчы елның 25 нче августында фашист гильотинасы астында  Муса  Җәлил һәм аның көрәштәшләренең гомере өзелде. Ел да Муса Җәлил һәйкәле янында герой-шагыйрьне, язучы А.Алишны һәм аларның көрәштәшләрен искә алу тантанасы уза.

Быел бу чарада гимназия укытучылары һәм укучылары да катнашты.Тантанада  Муса Җәлилнең кызы Чулпан Җәлилова, Абдулла Алишның туганнары да бар иде.Искә алу кичәсе һәйкәлгә чәчәкләр кую белән тәмамланды.