Татар иленең горурлыгы, күренекле галим Хатыйп Йосыф улы Миңнегуловның 12нче майда матур гомер бәйрәме - туган көне. Шул уңайдан 11нче татар гимназиясендә төрле чаралар уздырылды. 9нчы сыйныф укучылары белән берлектә "Галим сүзендә хикмәт бар" дигән темага түгәрәк өстәл узды. 11нче сыйныф укучылары галимнең фән дөньясына алып барган юлын өйрәнеп, проектлар якладылар. 4нче сыйныфларда "Галимнең балачагы" дип аталган әдәби утырыш бик җанлы узды. 

Шунысы куанычлы: быел гимназиядә Х.Й. Миңнегуловның музее үзенең ишекләрен ачты. Аны ачуда  галим үзе дә зур ярдәм күрсәтте, музейга шәхси әйберләрен, кызыклы экспонатлар тапшырды. Хатыйп аганың туган көне уңаеннан яшь экскурсоводлар музейда экскурсияләр уздырдылар, төрле сыйныф укучыларын галимнең тормыш һәм иҗат юлы белән якыннан таныштырдылар. Барлык укучылар, укытучылар исеменнән хөрмәтле галимебезне туган көне белән котлыйбыз. Тирән фикерле, гасырларны тоташтыручы шәхескә ныклы сәламәтлек, шатлык- сөенечләр, уңышлар телибез.

Рәхмәтебез, хөрмәтебез чиксез,

Аңлыйсыздыр аны, тоясыз.

Әле һаман халкым, милләтем дип,

Армый- талмый хезмәт куясыз.