Бүген 5а сыйныф укучылары тыл һәм хезмәт ветераны Миннибаева Җәмилә Фәхретдин кызын Бөек Җиңүнең 77 еллыгы белән котлады. Җәмилә апа чыгышы белән Актаныш ягыннан. 16 яшендә Казанга килгән һәм Казан оптика-механика заводында эшләгән. Сугыш вакытында һәм сыгыштан соңгы елларда тырышлыгы белән башкаларга үрнәк булган. Фидакарь хезмәте өчен төрле дәрәҗәдәге орден һәм медальләр белән бүләкләнгән. Җәмилә апа иптәше белән ике ул тәрбияләп үстергәннәр. Кызганыч, ире һәм бер улы инде вафат. Бүген безне икенче улы Рифкать абый каршы алды. Ул Җәмилә апаның хезмәт юлы турында укучыларга сөйләде һәм әнисенең яшь вакытта төшкән фотоларын күрсәтте. Җәмилә апа укучы кызларны күргәч, бик шатланды, аларга укуларында уңышлар теләде, тыныч һәм имин еллар булсын дип кат-кат кабатлады. Бүгенге очрашу укучылар күңелендә озак сакланып калыр дип уйлыйм.