Бүген татар теле һәм әдәбияты укытучысы Зәмфирә Фәнәвиевна ачык тәрбия сәгате үткәрде. Ул "Солдатта булган диләр..." исеме астында узды. Бу чарага ул үзенең укучысын, быел гына армия сафларыннан әйләнеп кайткан Фатыйхов Язнурны чакырган иде. Язнур 8 һәм 11 сыйныф укучыларына үзенең армия тормышы турында сөйләде, кызыклы һәм моңсу вакыйгаларны яңадан бер кат хәтерендә яңартты. Укучылар үзләрен кызыксындырган сорауларга җаваплар алдылар. чарада катнашкан һәркем бик канәгать калды.

22 февраль көнне мәктәбебездә "Ватанны саклаучылар көне"нә карата чара булып үтте. Аны   сыйныф җитәкчеләре Айдар Ханифуллович белән берлектә 10 сыйныф укучылары  әзерләгән иде. Бәйрәм бик күңелле һәм матур булды. Беренче өлештә укучы малайларны,егетләрне, укытучы ир- атларны бәйрәм белән котладылар, икенче өлештә 6-11 сыйныф укучылары ике командага бүленеп аш-суга осталыкта, прическа ясауда, кызларга бүләк ясауда һәм башка кызыклы конкурсларда көч сынаштылар.

17 февраль көнне балалар иҗат үзәгендә "Иң шәп вожатый" конкурсының район этабы булып үтте. Анда безнең мәктәпнең "Ялкын" бию коллективы һәм 5 нче сыйныф укучысы Гыйлемшина Ландыш чыгыш ясады.

15 февраль көнне мәктәбебездә "Ягез әле , егетләр!" бәйгесе булып узды. Ул Әфганстанда хезмәт иткән якташларыбыз хөрмәтенә оештырылды. Беренче өлештә Әфган сугышы турында сөйләнде.Анда катнашкан авылдашларыбыз тагын бер кат хатирәләрен яңарттылар. Икенче өлештә мәктәбебез егетләре  йөгерү, ераклыкка сикерү, аркан тартышу, турникта  тартылу , төз ату, автомат җыю кебек бәйгеләрдә үзара көч сынаштылар. 1 урынга Миннебаев Салават (11 класс) , 2 урынга Фатыйхов Фәннур (11 класс), 3 урынга Мусин Алмаз (10 класс)  лаек булды. Чараны оештырган Альберт Гыйлмулловичка рәхмәтебезне белдерәбез.

Чаңгыда йөрүнең сәламәтлек өчен файдалы икәнен һәрберебез белә. Шул максаттан чыгып һәм иң оста чаңгычыларны ачыклау өчен ел саен "Лыжня России" үткәрелә.11 февраль көнне "Лыжня России- 2012" дип аталган чаңгы ярышы безнең мәктәптә дә булып үтте. Һәр бала актив катнашты.

Бүген Саба гимназиясендә  математика буенча XIV  республика олимпиадасының муниципаль этабы үтә. Ул 6 нчы сыйныфлар өчен үткәрелә. Анда безнең мәктәптән Бәйрәмов Фәнис, Мусин Булат, Фазылова Зәлидә, Дәүләтҗанова Айсинәләр дә катнаша. Аларга уңышлар телибез!

Патриотик тәрбия айлыгы кысаларында "Яшелләр" һәм "Зәңгәрләр" командалары арасында бадминтон ярышы булып узды. Һәр катнашучы бик тырышып уйнады. 8 сыйныфтан Фазылова Зәринә - 1 урын, 7 сыйныфтан Харисова Ләйсән -2 урын, 5 сыйныфтан Закарова Илнара 3 урынга лаек булды. Егетләр арасында урыннар түбәндәгечә билгеләнде: 1 урын- Фатыйхов Фәннур (11 сыйныф), 2 урын- Мөхәммәдиев Булат (7 сыйныф), 3 урын- Сафин Айнур (8 сыйныф). Гомуми нәтиҗә ясап әйткәндә, бу ярышта "Зәңгәрләр " командасы җиңү яулады.

"Ялкын" бию төркеменең шөгыльләре Тимершык мәдәният йортында уза. "Талантның бер өлеше тумыштан, тугыз өлеше тырышлыктан" ди халык мәкале. Бу чыннан да шулай. Матур биюләрне сәхнәгә чыгарганчы бик күп шөгыльләнергә кирәк. Балалар Фазылҗанов Илназ Рәисович җитәкчелегендә төрле бию күнегүләре эшлиләр,конкурсларга әзерләнәләр, түгәрәккә бик теләп йөриләр. 4 февраль көнне булып узган иҗат- отчет концертында да биючеләребез үзләренең чыгышлары белән матур тәэссир калдырдылар. 

Һәр елны февраль ае хәрби-патриотик тәрбия айлыгы буларак үткәрелә. Быел да бу айлык кысаларында  "Аҗаган" уены, биатлон, Әфганстанда хезмәт иткән якташларыбыз катнашында волейбол ярышлары, стройда җырлап узу бәйгеләре һ.б. чаралар планлаштырылды. Бүген  мәктәп спортзалында югары сыйныф укучылары арасында баскетбол ярышлары булып үтте. Ярышта егетләр арасында "Яшелләр" командасы, кызлар арасында "Зәңгәрләр" командасы җиңү яулады. Иң яхшы уенчылар: Харисова Ләйсән (7 класс), Гарифуллина Илсинә (8 класс), Валиева Гөльяз (9 класс), Якупов Ильназ (9 класс), Фатыйхов Фәннүр (11 класс) булды.

6 февраль көнне китапханәче Гөлсинә Касыймовна тарафыннан  Ватанны саклаучылар көненә багышланган китап күргәзмәсе оештырылды. Укучыларыбыз татар һәм рус телләрендә чыгарылган китаплар аша сугыш елларының авырлыгын күзаллый алдылар.