30 сентябрь-5 октябрь атналыгында көз күчтәнәчләре турында сүз алып барылды. Зурлар төркеменең шул уңайдан ясалган күмәк эше.

  3 нче октябрь көнне бакчабызда гомуми ата-аналар җыелышы булды. Бакча мөдире Муратова Э.Ш. узган уку елына тулы нәтиҗәләр ясады, 2013/14 уку елына куелган максатлар һәм бурычлар белән таныштырды. Икенче көн тәртибе буенча, һава шартлары алшынып авыртучылар санын булдырмау максаты белән һәм гриппка каршы прививкалар ясатырга кирәклеге турында  "Грипп һәм аңа каршы чаралар" исемле тема астында Эзмә ФАП мөдире Шәйхутдинова Гөлназ Шәмсетдиновна чыгыш ясады. Өченче көн тәртибе буенча Саба социаль яклау хезмәткәре Гайфиева Сәрия Закировна 2014 нче елның 1 нче гыйнварыннан әти-әниләргә Саба муниципаль җирлеге тарафыннан өстәмә конпенсация бирелү турында аңлатып  чыгыш ясады. Әлеге мәсьәлә буенча әти-әниләрнең сорауларына да җаваплар бирелде. Кызганычка каршы җыелышыбызга  Насыйбуллин Ильнур Дамирович кына килә алмады, ул да чакырулы иде. Дүртенче көн тәртибе буенча төрле мәсьәләләр каралды, мәсәлән: әти-әниләр комитеты председателе итеп Яруллина Кадрия сайланылды; бакчабызның әйләнә-тирәсендәге агачларны кисү буенча өмәне ял көне,6 нчы октябрьдә,сәгать 14:00 да үткәреләчәге ачыкланды.

  Математик гамәлләрне менә шулай апалар безгә ясап бирәләр, ә без рәхәтләнеп буйыйбыз, исәплибез, язабыз.

    21 нче сентябрь көнне оештырылган кросста без дә, "Саф чишмә" балалар бакчасы да, катнаштык. Башта балалар, мәктәп укучылары ярышса, ахырдан барлык тәрбиячеләр белән мөдир, укытучылар белән директор, авыл җирлеге хезмәткәрләре белән башлыклары, медицина, мәдәният  хезмәткәрләре һәм районнан килгән вәкил Сөнгатов Шәмсүн абый Акберович та ярышып үз көчләрен сынап карадылар. Ахырдан мәктәп хезмәткәрләре ярышта катнашучыларны коймак һәм кайнар чәй белән сыйладылар. Гомумән, оештырылган әлеге чара бик күнелле үтте! 

  20 нче сентябрь көнне бакчабызның зурлар һәм мәктәпкәчә яшьтәге балалар төркемендә "Мәктәп алды яшендәге балаларны мәктәпкә әзерләү буенча алга куелган мәсьәләләр" темасы буенча ата-аналар җыелышы булды. Бакча мөдире Муратова Э.Ш. 2012/13 уку елына йомгак ясап мониторинг нәтиҗәләре белән таныштырды. Бакчаның эчке кагыйдәләрен әти-әниләргә тагын бер тапкыр исләренә төшерелде. Икенче көн тәртибе буенча Сүз Тәрбияче Шайдуллина И.Р. бирелде. Илсөяр Ракиповна әти-әниләргә балалар белән эшчәнлекләр ни рәвешле алып барылуы, нинди дәфтәр-китаплар белән эш алып барылуы турында сөйләде. Тәрбиячеләр әти-әниләргә киңәшләрен биреп, үз фикерләрен әйтеп, киләчәктә бергәләшеп эшләгәндә генә уңай нәтиҗәләргә ирешеп булачагына басым ясадылар. 2014/15 нче уку елында бакчабыздан 19 бала мәктәпкә укырга керү сәбәпле, әлеге төркемдә ата-аналар җыелышын аерым үткәреп, әти-әниләрнең һәр соравына аерым тукталып җавап бирүне яхшы чара буларак кабул иттек.

  Эшчәнлек вакытында өстәмә "кунаклар" да килсә, балаларның күңеленә тагын да ныграк үтеп керә һәм озаграк саклана. Кунакка Шүрәле килгән көн балалар өчен бик шатлыклы көн булгандыр дип уйлыйбыз. Ул көнне баланы алырга килгән һәрбер әти-әнигә балалары зур яңалык итеп Шүрәле,  аның ни өчен килгәнлеге турында сөйли-сөйли өйләренә таралдылар. 

    Буш вакытны табып тиз генә бакча тирәсен чүптән арындырга дип без дә эшкә чыктык. Бер эштән дә курыкмыйбыз! 

6 нчы сентябрь көнне бакчабызда кич белән чираттагы "2012/13 нче уку елына нәтиңәләр һәм 2013/14 нче уку елына еллык эш планын кабул итү, укыту-тәрбия проекты белән танышу" темасы астында педагогик киңәшмә уздырылды. Бакча мөдире узган уку елына нәтиҗәләр ясады, һәр хезмәткәрнең үз вазифаларын янә искә төшерде, инструктажлар үткәрелде. Бергәләшеп еллык эш планы белән таныштылар, фикерләр тыңланылды, төзәтмәләр кертелде, һәм план кабул ителде. Мәгариф министрлыгы тарафыннан җибәрелгән проект турында да фикерләр тыңланылды. Бакчабызның эчке кагыйдәләре дә барланылды, яңадан искә төшерелде. Өч сәгать дәвам итткән җыелыштан һәр хезмәткәр үзенә куелган бурыч һәм максатын белеп, үз хезмәтен нәтиҗәле итеп эшләргә кирәклеген аңлап кайтып китте. 

  Һәр елны көзен уза торган ремонт эшләре тагын башланды. Бакчабызны тагын да яңартырга, матурларга теләп, тәрәзәләр, ишекләр, баскычлар, хәтта өч төркемнең уен бүлмәләренең диварлары да буялды. Чын-чынлап бакчабыз яңарып китте.

  Кечкенәләр төркемендә әкиятләрне менә шул рәвешле сәхнәләштереп уйныйлар. Эчтәлекләрен яхшылап өйрәнәләр, ахырдан нәтиҗәләр ясыйлар. Балалар бик теләп, ярышып рольләрне бүлешәләр. Әле генә телләре ачылып килгән сабыйлар рольгә кереп тырышып-тырышып сүзләрне әйтеп аңлаталар.