Бүген көнебез саф һавада узды. Обелискка чәчәкләр салганнан соң, кече Сабантуй оештырдык, халкыбызның яратып уйнала торган уеннарын уйнадык. Ә саф һавада төшке аш - үзе бер рәхәт! Көнебез сизелми дә үтте.

22нче июнь - Хәтер һәм кайгы көне уңаеннан обелискка салу өчен чәчәкләр ясау, "Табигать әлифбасы" дигән экологик уен, биюләр һәм күңелле уеннар белән тагын бер көнебез артта калды. 

Бүген көнебез бик күңелле һәм мавыктыргыч булды - башкалабыз Казан шәһәрендә экскурсиядә булдык.

"Үзем ясыйм!" дип аталган остаханәдә укучыларыбыз кәгазьдән, пластилиннан төрледән - төрле әйберләр ясадылар, әзер эшләрдән күргәзмә оештырылды. Болынга экскурсиягә чыгып, табигать кочагында ял иттеләр.

Бүген лагерьда театр көне булды. Укучыларыбыз гадәти булмаган костюмнар әзерләп килде, әкиятләрдән төрле өзекләр куелды.

Укучыларыбыз өчен тагын бер көн артта калды. Иртәнге аштан соң "Кем иң акыллы?" конкурсы уздырылды, җиңүче укучылар билгеләнде. Саба районы җәмгыяви инспекторы  Исхакова А.Р. тарафыннан  җәйге чорда куркынычсызлык кагыйдәләре буенча профилактик әңгәмәдә үткәрелде. Саф һавада төрле хәрәкәтле уеннарда да укучылар актив катнашты.

"Наркотикларсыз тормыш" айлыгы кысаларында  Эзмә ФАП фельдшеры Шәйхетдинова Г.Ш. укучыларыбыз белән профилактик әңгәмә үткәрде.  Айлыкның дәвамы итеп "Без сәламәт тормыш яклы" дип аталучы флешмоб оештырылды. Төшке аштан соң укучыларыбыз белән ГТО фестивале уздырылып, нәтиҗәләр ясалды.

Лагерьдагы көнебез бүген күңелле һәм файдалы экскурсияләргә бай булды.Укучыларыбыз Сатыш авылы музей - мәдрәсәсендә, районыбыз үзәгендә булдылар. 14нче июнь - Бөтендөнья донорлар көне буларак, мәктәбебезнең педагог - оештыручысы, почетлы донор Зиганшина Н.С. укучыларыбыз белән очрашу оештырды.

Бүген лагерьга йөрүче укучыларыбыз белән үткәрелгән "Мин үзенчәлекле" дип аталучы тренинг барысына да ошады. Шулай ук милли спорт төрләре буенча ярышта, саф һавадагы күңелле уеннарда укучылар бик актив катнашты.