25 нче март көнне “Сәләтле балалар мәктәбе” укучылары һәм укытучылары белән берлектә районыбызның сугыш ветераны, 41 ел гомерен укытучы һөнәренә багышлаган – Бибарцева Тәскирә Хасановнаның хәлен белеп кайттык. Олы яшьтә булуына карамастан, Тәскирә апа безне көләч йөз белән каршы алды. Сугыш вакыты хатирәләрен  күңелендә яңартып, күз яшьләре аша безгә дә җиткерде. Әңгәмәне дәвам итеп, без аның прожектор полкында хезмәт иткәнен белдек. 1942 нче елда, сугышның иң дәһшәтле чорында землянкада ничек Партияга алынуын, Муса Җәлил белән таныш булганын, аның тарафыннан беренче тапкыр “Ватан” сүзен ишеткәнен, Сталинны үз күзләре белән күргәнен, “Ватан сезне беркайчан да онытмас!” дигән сүзләрне әйткәнен ул бүгенгедәй хәтерли. “Чыннан да, онытмый бит, менә сез килдегез!”- дип, шатланды.  Бергә фотосурәткә төшеп, рәхмәтләребезне әйтеп, без кайтырга чыктык. Ул да безне өй алдына кадәр чыгып, озатып калды.