6 март көнне, 8 март халыкара хатын – кызлар бәйрәме уңаеннан, мәктәбебездә интеллектуаль уен  “Белем аукционы”  үткәрелде. Аукционда 5-11 сыйныфлардан икешәр кыз катнашты. Аукцион 4 турдан торды һәм һәр тур арасында, күңелле тәнәфес ясап, һәр сыйныф үзенең матур концерт номерлары белән сөендерде.
     Аукцион, күп кенә телеканаллардагы тапшыруларга хас булганча, сорау – җавап рәвешендә барды. Сораулар төрле фәннәрдән алынып, логик фикер йөртүгә нигезләнгән иде.
     5-7 сыйныф кызлары арасыннан, иң күп сорауларга җавап табып, җиңүче исеменә 7 нче сыйныф укучысы Гаптрахманова Камилә лаек булды. Ә 8- 11 сыйныф кызлары арасыннан җиңүче итеп 9 нчы сыйныф укучысы Шәрәфетдинова Диләрә сайланды. Җиңүчеләргә һәм барлык катнашучыларга дипломнар һәм татлы призлар тапшырылды.
    Шушы форсаттан файдаланып, мәктәбебез коллективындагы хатын – кызларны, кызларны 8 март бәйрәме белән чын күңелдән котлыйбыз. Эшләрендә, укуларында, гаиләләрендә зур уңышлар телибез.