Язгы каникулны файдалы, кызыклы үткәрү һәм һөнәр сайлау буенча тәҗрибә туплау максатыннан 7б, 9 нчы сыйныф укучылары “Саба” индустриаль паркына экскурсиягә бардылар. Парк үз эченә берничә төр завод эшчәнлеген алган.
ҖЧҖ “Цинк Саба”  — металлны кайнар цинклау заводы. Заводка сәяхәт химик элементлар буенча интеллектуаль сораулардан башланды һәм әлбәттә инде, дөрес җавап өчен бүләкләр дә бар иде. Баш инженер цинклауның кайнар ысулы-тимерне һәм корычны агрессив тирәлектән саклауның нәтиҗәле ысул булуын, әлеге заводта эшләү өчен кайсы уку йортларында  белем алырга кирәклеген бәйнә-бәйнә аңлатты.
«BhB system» вентиляторлар заводының эшчәнлеге киң җәелгән булуы, вентиляторларның төрләре, Сабада җитештерелгән вентиляторларны Республикабызда һәм чит илләрдә кайда күреп булганлыгы турындагы мәгълүматны да укучыларыбыз кызыксынып тыңлады.
ҖЧҖ “Трейд металл” оешмасының зур-зур тимерләргә икенче сулыш өрүен, заводтагы техника, приборларның эшләү рәвешен укучылар үз күзләре белән күреп кайттылар.
Кызларның күңеленә бигрәк тә “ADAMANTA” алмаз фрезалар ясау заводы хуш килде. Аларны ясау, алмаз белән йөгертү үзенчәлекләре белән якыннан таныштылар.
Ә без үз чиратыбызда “Саба” индустриаль парк җитәкчелегенә, хезмәткәрләргә зур рәхмәт белдерәбез, киләчәктә уңышлар телибез.