ТР Рәисе хозурындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе, Татарстан Республикасы Мәдәният министрлыгы, ТР Мәгариф һәм фән министрлыгы, Роберт Миңнуллин исемендәге Республика балалар китапханәсе тарафыннан оештырылган Габдулла Тукай исемендәге ХV махсус нәфис сүз бәйгесенең муниципаль этабы бүген, ягъни 9 нчы октябрь көнне Ә.Каримуллин исемендәге Саба үзәк район  китапханәсендә гөрләп үтте. Әлеге конкурс балаларны һәм яшүсмерләрне берләштерә торган, татар әдәбиятының бай дөньясына яңа буынны җәлеп итүче, яшьләр һәм балаларда ватанпәрвәрлек хисләре һәм милли үзаң тәрбияләүче, туган якка, ватанга мәхәббәт хисе формалаштыручы әһәмиятле мәдәни вакыйга. Татар халкының бөек шагыйре Габдулла Тукайның тууына 140 ел тулу уңаеннан оештырылган әлеге бәйгедә 26 укучы бала өч төркемдә көч сынаштылар (1-4, 5-8 һәм 9-11 сыйныфлар). Бәйгедә мәктәбебез  укучылары Галимбәков Камил (3 б сыйныфы), Хәлимова Зара (5 а сыйныфы), Гәйнетдинова Алинәләр (10 нчы сыйныф) көч сынашты. Мәртәбәле жюри тарафыннан укучыларыбызның осталыклары югары бәяләнде һәм бүләкләнде. Алинәбез җиңүче исеменә лаек булып, республика этабында чыгыш ясарга юллама алды. Һәр катнашучыны һәм аларның җитәкчеләрен чын күңелдән котлыйбыз, алга таба да уңышлар телибез.