8 нче октябрь көнне 10, 7 нче сыйныф укучылары «Саба үзәкләштерелгән туган якны өйрәнү музее»на кунакка бардылар. Анда  «Пушкин картасы» нигезендә ТАССРның Габдулла Тукай исемендәге Дәүләт премиясе лауреаты, Казан университетында доцент булып эшләгән Татарстанның халык язучысы, галим-әдәбият белгече Мөхәммәт Мәһдиевның шул ук исемдәге автобиографик повесте мотивлары буенча төшерелгән «Без - 41нче ел балалары» фильмын карадылар. М.Мәһдиев музее хезмәткәрләренең фильм төшерү турындагы истәлекләре укучыларга аеруча да хуш килде.
     Сюжет - Бөек Ватан сугышы елларында педагогия училищесында укучы яшүсмерләр тормышы турында. Игътибар үзәгендә 14-15 яшьлек биш яшүсмер. Аларның кайберләре белән тамашачы фильмның беренче минутларыннан ук таныша. Сугыш фильмда фон буларак бирелә. Бу балаларның сугышта әтиләре, өлкән абыйлары, ә әниләре авылда кечкенә балалар үстерә, фронттан хәбәр көтә. Шул ук вакытта училищеда тормыш кайный һәм бу вакыйгалар бердәм тормыш челтәренә үрелеп бара.