2024 елның 27-28 нче февралендә Вахитов районы Каюм Насыйри исемендәге 80 нче мәктәп базасында  мәктәпкә нигез салынуга 100 ел тулу уңаеннан һәм татар мәгърифәтчесе Каюм Насыйриның тууына 200 ел булу белән бәйле чараларның әзерлек этабы буларак оештырылган «Насыйри укулары» дигән халыкара фәнни-гамәли конференциясе узды. Конференциядә фән кандидатлары, югары уку йортлары профессорлары, доцентлары җитәкчелегендә түбәндәге секцияләр эшләде: «Каюм Насыйри тикшеренүләре һәм педагогик эшчәнлеге контекстында мәктәптә һәм югары уку йортында үсеп килүче буынны укыту һәм тәрбияләүнең актуаль проблемалары», «Мәгарифтә сәламәтлекне саклау технологияләре», «Баланың әхлакый һәм интеллектуаль үсеш нигезе буларак гаилә», «Туган якны өйрәнү, милли төбәк һәм мәгариф тарихы», «Мәгарифтә фән һәм технологияләр», «Әдәби иҗат», «Фән өлкәсендә беренче адымнар», «Табигый фәннәр һәм экология». Шулай ук конференциянең пленар утырышы уздырылды. Катнашучылар: студентлар һәм Казан федераль университетының географик һәм экологик белем бирү теориясе һәм методикасы кафедрасы хезмәткәрләре. Анда мактаулы кунак - РФ Табигый фәннәр академиясе вице-президенты, РФ Табигый фәннәр академиясенең Татарстан бүлеге җитәкчесе, техник фәннәр докторы И. Р. Утәмешев та катнашты. Конференцияне оештыручыларга зур рәхмәтебезне белдерәбез.