Агымдагы елның 10 нчы февралендә Идел буе районының 6 нчы гимназия базасында башлангыч сыйныфларның  рус төркемнәрендә эшләүче татар теле һәм әдәбияты укытучылары өчен “Татар теле һәм әдәбияты дәресләрендә метапредмет нәтиҗәләргә ирешү өчен заманча технологияләр һәм алымнар куллану” дигән тема астында район семинары булып узды. Семинарда Мәгарифне үстерү институтының татар теле һәм әдәбияты кафедрасы мөдире Шәмсетдинова Р.Р., шул ук институтның башлангыч сыйныф кафедрасы методисты Җамалетдинова З.И., район мәгариф бүлеге методисты Җиһангирова М.В. катнашты.  1 нче сыйныфлар белән күрсәтелгән дәресләрдә  татар теле һәм әдәбияты укытучыларына “Сәлам” укыту-методик комплекты һәм В.Н.Мещерякова методикасы белән танышу мөмкинлеге бирелде. Семинар эчтәлекле һәм файдалы үтте.